Jeta e Osmanit është e mbushur plot me tragjedi. Bashkëshortja e tij, u nda nga jeta si pasojë e sëmundjes së rëndë dhe e la vetëm me dy djemtë e tij. Në emisionin “Dua të të bëj të lumtur”, Osmani rrëfeu se u detyrua t’i dërgonte fëmijët në jetimore, si pasojë e pamundësisë ekonomike, pas vdekjes së bashkëshortes.
Ai kishte ftuar dy djëmtë e tij në studio, ku përmes një letre u kërkonte falje që u detyrua ti braktiste në Shtëpinë e Fëmijës.
“Babi nuk ka mundësi që t’iu siguroj një jetë të mirë. Dua shumë që edhe ju të jetoni si fëmijët e tjerë dhe mos t’iu mungojë asgjë. Më falni që ju dërgova në jetimore duhet të kishim qëndruar bashkë dhe nuk duhet të ishim ndarë asnjëherë”, tha Osmani.
Menjëherë pas mesazhit të së atit, djemtë u shprehën se ai nuk ka asnjë faj për asgjë.
Por fëmijët treguan se nuk duan të kthehen sërish në jetimore, dhe se iu vinte turp t’u tregonin shokëve ku jetonin. Për ta, është e rëndësishme që të jetojnë me të atin edhe në një shtëpi modeste si ajo e tyre.
Në fund programi “Dua të të bëj të lumtur” i dhuroi 6 muaj shpenzime në rrjetin e supermarketeve “Spar” dhe veshje nga dyqani “BluKids”.
Osmani u shpreh se kishte shumë dëshirë që të gjente një punë që të bashkohej me fëmijët e tij.
