Më 22 prill, fshati Kaninë në Vlorë u përfshi nga atmosfera festive e një dasme gjigante që së fundmi është shndërruar një një mollë të vërtetë sherri. Kjo pasi nuk bëhet fjalë për një dasmë dosido, por për dasmën e Skënderbeut me Donikën, e cila është riinskenuar në Kalanë e Kaninës në 567-vjetorin e martesës së heroit tonë kombëtar. Protagonistët e festës dhe të ftuarit e shumtë, mes të cilëve edhe pasardhës të Gjergj Kastriotit, kanë rikrijuar atë që njihet si një prej dasmave më të famshme të historisë së kombit shqiptar. Mirëpo, organizmi duket se nuk është pritur mirë nga të gjithë.
Duke e krahasuar me eventin e procesionit masiv organizuar në Romë, Drejtori i Agjencisë së Bregdetit Auron Tare e cilëson si “farsë komike” dasmën e organizuar në Kaninë.
“Që tek figura qesharake e Skënderbeut të shkretë me këpucë me qafa si personazhi i ‘Bob the Builder’, hipur në një kafshë që më shumë më dukej si Dhi e bardhë dhe jo si kalë” ironizon Tare.
Për historianin Auron Tare, e gjithë përgjegjësia e dështimit të këtij eventi bie mbi paaftësinë e deputetit socialist Fate Velaj, i cili është dhe organizator i eventit.
“Përse vallë jemi kaq të paaftë të prodhojmë gjëra serioze? Përse vallë një ide e shkëlqyer e turizmit të trashëgimisë kulturore duhet të kthehet në një theatër banal fshati? Përse e bëjmë edhe Skëndërbeun e shkretë qesharak?” shkruan Tare.
Sakaq, deputeti socialist Fate Velaj i është përgjigjur ashpër akuzave të historianit, duke e theksuar se “Dasma e Kombit” është organizuar pas asnjë ndihmë financiare nga Ministria e Kulturës dhe Bashkia e Vlorës.
“E para u hodh helmi i një hardhuce se dasma ka marrë para publike prej 25 milionë lekë. Do të ishtë mirë të kishte marrë por, nuk mori. Nuk u mor asnjë lek as nga Ministria e Kulturës dhe as nga Bashkia e Blorës. Zero. Shkno pyesni. Hapni dosjet dhe shikoni. Festa u financua nga djemtë e Kaninës për ta nisur këtë ngjarje në vitin jubilar të Skëndërbeut. Ta krahasosh Kaninën me Romën, është groteske. Mjerane. Vetëm buxheti i kulturës së bashkisë së Romës është më i madh se i shtetit shqiptarë” shkruan Fate Velaj.
Deputeti socialist nuk lë pa akuzuar edhe historianin Auron Tare, se prej 27 vitesh ai dhe historianë të tjerë, kanë bërë lëmsh Shqipërinë.
“Ata që janë mësuar ta shohin kalin nga dhëmbët, e duan Shqipërinë vetëm me festa ëmbëlsirash. Me festën e mishit të pjekur. Janë ata që kanë 27 vite që merren me analizat se kur iku gjermani i fundit nga shqipëria, në datë 28 apo 29 nëntor 1944 e shpikën festat e tyre. Të revanisë. Të asudesë. Të reshedisë. Të dhisë e të kecit. Ata që kanë 27 vite që Skëndërbeun e një herë serb e një herë bullgar. Një herë Malazez e një herë kinez, por asnjëherë shqiptarë. Por, kur shohin të realizohet një festë ku mblidhet shqiptarizmi, kërkojnë ta çojnë kalin tek dentisti” shkruan Fate Velaj.
