Reperi shqiptar Kleviol Ahmeti, i njohur për publikun si Cllevio, ka bërë disa deklarata të forta gjatë një interviste në një podcast me Grida Duma, ku ka folur hapur për jetën personale, ndikimin në publik dhe pasurinë e tij.
Gjatë bisedës, ai u ndal te roli që mendon se ka në shoqëri, duke u shprehur se ndikimi i tij është i konsiderueshëm. “Me influencën që kam, nxjerr dy deputetë”, tha ai, duke lënë të kuptohet se e sheh veten si një figurë me peshë në opinionin publik.
Deklaratat e tij vijuan edhe në një plan më personal, ku përmendi marrëdhënien me familjen dhe bindjet politike brenda saj. Cllevio tregoi se mbështetja për Sali Berisha ka qenë aq e fortë në familjen e tij, sa në disa raste ka sjellë edhe përplasje të ashpra.
Ai foli gjithashtu për një nga periudhat më të vështira të jetës së tij, kohën në burg, të cilën e përshkroi si një moment reflektimi. Sipas tij, kjo eksperiencë nuk e ndaloi, por përkundrazi e shtyu të mendojë ndryshe për të ardhmen dhe mundësitë që kishte përpara.
Reperi zbuloi se pikërisht gjatë kësaj periudhe hodhi hapat e parë në biznesin e syzeve, duke e kthyer një situatë të kufizuar në një mundësi përfitimi.
Në fund, ai preku edhe çështjen e pasurisë, duke deklaruar për herë të parë se zotëron rreth dy milionë dollarë. “Dikur vetëm ëndërroja, sot i kam arritur”, u shpreh ai, duke përmbyllur rrëfimin e tij.
