Artistët shqiptarë me punën dhe vullnetin e tyre kanë arritur të krijojnë një emër dhe të respektohen nga të gjithë. Jeta e tyre jo gjithmonë është aq e lehtë dhe e bukur sa ne e shohim nëpërmjet ekranit apo rrjeteve sociale. Kushtet ekonomike, familjare apo dhe artistike i kanë detyruar ata të lënë Shqipërinë për t’u zhvendosur drejt vendeve të ndryshme të botës.
Kush janë ata dhe për çfarë arsye janë larguar?
Kompozitori ynë i njohur Shpëtim Saraçi dhe këngëtarja Mira Konçi vendosën para disa muajsh të largohen drejt SHBA-së, për të nisur një jetë të re.
Ky largim erdhi menjëherë pasi Shpëtim Saraçi u hoq nga puna pranë TVSH-së. Ishte vetë kompozitori Saraçi ai që e dha lajmin e largimit, duke u shprehur i zhgënjyer nga Shqipëria.
Kur ata ndodheshin në Shqipëri, veprimtaria e tyre artistike ishte më e rrallë në skenë, por duket se dy artistët janë angazhuar seriozisht në SHBA.
Kjo gjë duket edhe në një postim të organizatores së eventeve në Toronto të Kanadasë, Teuta Ajdini Haxhillari. Ajo publikoi para disa kohësh një foto të Saraçit e Konçit duke punuar dhe fton shqiptarët në SHBA t’i bashkëngjiten eventit.
“Artistët e shquar shqiptarë, këngëtarja e madhe Mira Konçi, dhe një nga kompozitorët më të shkëlqyer shqiptarë, Shpëtim Saraçi të ftuar në “Rh Scholarship Event November 18”. Ju mirëpresim!”, ka shkruar Haxhillari.
Hueyda El Saied është një ndër personazhet më të dashura të publikut shqiptar që spikati vite më parë kur u shfaq në “12 vallëzime pa një të shtunë”. Ajo ka qenë shumë prezente në mediat shqiptare, por njohja më francezin Michael Tamisier bëri që ajo të largohej drejt Luksemburgut për të nisur një jetë të re.
Në Luksemburg ish-balerina iu përkushtua pasionit të saj për pikturën dhe shkrimin. Shumë shpejt solli në jetë dhe djalin e saj Gabrielin.
Gjatë muajit nëntor të këtij viti patëm fatin ta kishim përsëri në Tiranë Hueyda-n, e cila dha dhe lajmin e saj të ndarjes nga bashkëshorti. Pavarësisht kësaj ajo ka vendosur që jetën e saj ta vazhdojë në Luksemburg së bashku me djalin e saj.
Këngëtari Vedat Ademi la Tiranën për SHBA-në. Ai është vendosur së bashku me familjen e tij. Në një intervistë që ai ka dhënë para disa kohësh ka treguar se nuk është larguar përgjithmonë.
“Pavarësisht se ku ndodhem fizikisht, publikut tim nuk do t’i mungojë asnjëherë. Angazhimet e mia në SHBA janë familjare dhe profesionale. Jam duke punuar në disa projekte në të njëjtën kohë”, ka thënë Vedati.
Para pak kohësh Vedati është bërë baba për herë të dytë.
Këngëtari Big Basta është zhvendosur gjithashtu drejt SHBA-së. Largimi i tij u shoqërua edhe me komentin që ai është ndarë nga bashkëshortja e tij Vesa Luma, me të cilën ka edhe një djalë.
Pavarësisht thashetheme çifti ka treguar gjithmonë se largësia nuk mund t’i ndajë dhe ata vazhdojnë të jenë akoma bashkë. Së shpejti pritet që edhe Vesa t’i bashkohet Big Bastës në Amerikë. Nuk dimë ende se me çfarë është i angazhuar në SHBA këngëtari i njohur.
Moderatorja Floriana Garo pas shpalljes së fejesës, mori gjithashtu vendimin e papritur për të hequr dorë nga “Jo vetëm modë” dhe për t’u transferuar në Zvicër.
Ishte vetë Floriana ajo që bëri ndryshim vendndodhjen në “Facebook” ku shkroi “Transferim në Gjenevë”. Ajo vendosi t’i përkushtohet dashurisë së saj dhe nisi punë në rolin e specialistes së marrëdhënieve më publikun, pranë kompanisë që drejton bashkëshorti i saj.
Momentalisht Floriana është në pritje të ëmbël të vajzës së saj që do të vijë në jetë së shpejti.
Elvana Gjata që pas publikimit të hitit të saj të fundit “Lejla” nuk është më prezente përsa i përket karrierës muzikore dhe është zhvendosur drejt SHBA-së, ku po punon fort për të hyrë brenda tregut ndërkombëtar muzikor.
Belona Qereti një ndër këngëtaret shqiptare më të komentuara dhe më të diskutuara është larguar prej vitesh nga Shqipëria drejt SHBA-së së bashku me familjen e saj, ku nisi dhe një jetë të re familjare së bashku me ish-bashkëshortin e saj Granitin.
Pas ndarjes nga ai, këngëtarja simpatike po punon gjithashtu fortë për të qenë pjesë e tregut ndërkombëtar. Për të tashmë nuk mund të themi se ka një destinacion përfundimtar sepse jeta e saj është e lidhur më shumë me udhëtimet në avion për shkak të angazhimeve artistike në vende te ndryshme të botës, megjithëse shtëpia e saj fizike është në Amerikë.
Besa Kokëdhima e la Shqipërinë për Parisin. Ajo u zhvendos në muajin tetor për të nisur një jetë të re, megjithëse ka thënë se nuk do të lërë pas dore edhe projektet muzikore, si në gjuhë të huaj dhe në shqip.
Këngëtarja shkodrane Elhaida Dani u bë e njohur pasi fitoi “Star Academy” në vitin 2009 dhe “Top Fest” në vitin 2012. Në po këtë vit, ajo u zhvendos në Itali ku u shpall fituese e “The Voice of Italy” dhe emri i saj u bë edhe më i njohur në botë, pas pjesëmarrjes në festivalin e “Eurosong”.
Albërie Hadërgjonaj është zhvendosur në Amerikë së bashku me vajzat e saja. Pavarësisht se është larguar ajo nuk harron të kthehet në Shqipëri dhe mund të themi se bën një jetë të dyjëzuar mes Shqipërisë dhe Amerikës. Ajo është pjesë e evenimenteve që organizohen nga shqiptarët në vende të ndryshme të botës.
Balerina Klaudia Pepa u vendos përfundimisht në Itali, pas triumfimit të saj në emisionin “Amici”. Ajo ka vendosur të vazhdojë jetën artistike në Itali, ku ka hapur edhe një shkollë të baleti. Largësia e ndau balerinën e njohur dhe nga koreografi Albi Nako.
Burimi: Iconstyle.al
