Pavarësisht pozicionit që mban, kodi i veshjes është po aq i rëndësishëm sa edhe çështjet politike. Duhet të dish sa lëkurë të nxjerrësh dhe sa seriozë duhet të vishesh, sidomos kur flasim për vendet islamike, si Jordania.
Presidenti i Shqipërisë, Bujar Nishani dhe Zonja e Parë, Odeta Nishani u mirëpritën nga Mbreti i Jordanisë, Abdullah Al Hussein dhe Mbretëresha Rania Al Abdullah, në Amman të Jordanisë.
Të dy meshkujt ishin veshur me kostume klasikë, Nishani ngjyrë blu, ndërsa Mbreti ngjyrë gri. Nga ana tjetër Mbretëresha mbante veshur një kostum të zi me fund të gjatë poshtë gjurit, siç është kodi i veshjes për zonjat, me një këmishë-golf të bardhë.
Në anën e djathtë të Presidentit Nishani qëndronte bashkëshortja Odeta Nishani, e cila ra në sy për fundin tepër të shkurtër (sipër gjurit) dhe xhaketën me jakë thuajse dekolte.
Prestigjiozja “Conde Nast Traveler” specifikon kodin e veshjes për takimet zyrtare në Jordani: “Kostumet dhe këpucët duhet të jenë të thjeshta, ndërsa fustanet për gratë kërkohet të kenë gjatësi poshtë gjurit dhe me mëngë”.
Mbretëresha Rania është një ndër figurat mbretërore më të vlerësuara për stilin nëpër botë, e megjithatë me gjatësinë e fundit nuk bën kurrë kompromis në takimet qeveritare.
Ky kod veshjeje nuk vlen vetëm për zonjat e para të shteteve myslimane.
Michelle Obama nuk vishet asnjëherë me funde mbi gju në takimet qeveritare. Kur në 2010-n Barack Obama dhe Michelle Obama takuan presidentin Nicolas Sarkozy dhe bashkëshorten ish-modele, Carla Bruni, dy zonjat e para kishin dy të përbashkëta: jakën-fjongo dhe fundin në gjatësinë e gjurit.
Ndërsa po t’i kthehemi vizitës së fundit të Presidentit shqiptar në Amerikë, të njëjtën shkelje të kodit të veshjes vëmë re të përsëritur nga Odeta Nishani. Ndoshta Zonja e Parë ka nevojë për të këshillues për stilin, në lidhje me respektimin e kodit të veshjes!
