Një ngjarje e rëndë ka tronditur opinionin publik në Belgjikë, ku një nënë 46-vjeçare dhe vajza e saj vetëm 6 vjeç janë gjetur pa shenja jete pas një zjarri në banesën e tyre në zonën Hasrode, pranë Oud-Heverlee. Familja ukrainase, e zhvendosur në Belgjikë gjatë tre viteve të fundit për shkak të luftës, jetonte në këtë shtëpi që tashmë është kthyer në skenë tragjedie.
Hetimet paraprake kanë zbuluar shenja dhune në trupat e viktimave, përfshirë plagë të shkaktuara nga mjeti i mprehtë, çka shton dyshimet se zjarri është ndezur për të fshehur gjurmët e një krimi të rëndë.
Sipas mediave lokale, ngjarja ndodhi mëngjesin e së premtes, rreth orës 09:30. Nëna ka humbur jetën menjëherë si pasojë e plagëve, ndërsa e bija u gjet në gjendje kritike, por nuk mundi t’i mbijetojë asaj që për autoritetet po cilësohet një akt i paramenduar.
Rasti bëhet edhe më i rëndë duke marrë parasysh faktin se kryefamiljari, bashkëshorti i viktimës dhe babai i vajzës, ndodhet në Ukrainë, ku shërben në vijën e frontit.
Autoritetet belge janë duke hetuar me përparësi të lartë këtë ngjarje dhe nuk përjashtojnë asnjë pistë.
