Gazetari i njohur Artan Hoxha ka folur së fundmi, si rrallëherë, për punën e tij investigative në botë e krimit.
I pyetur nga Donald dhe Romeo Veshaj në “Më Lë të Flas”, nëse ndihet i rrezikuar në punën e tij, gazetari tregoi se si i është dashur të negociojë me persona që ishin urdhëruar ta vrisnin.
“Kaq vite sa kam në punë, kanë kaluar shumë eksperienca, por kur e mendoj më vjen për të qeshur se nuk qaj dot. Më është dashur të negocioj me njerëz që u kishin dhënë urdhër të më fusnin një plumb. Ai që kishte dhënë urdhër thoshte tek plumb, se ai qitsi ishte nga ata që nuk shtinte të martën, por të mërkurën ta fuste një plumb për dhuratë atij që kishte dhënë porosinë”- tregoi Artan Hoxha.
Më tej gazetari, zbuloi edhe ‘strategjinë’ e tij për t’u mbrojtur.
“Unë zakonisht rri në lokale që njoh pronarin, klientela, mundësisht nga i vjen rakia, pijen e marr vetë te banaku. Zakonisht shpatullat i vë pas muri dhe të kem një kolonë që mund t’i shmangem goditjes së parë. Në bllok më ke parë se të gjithë ata të fortët që rrinin aty janë zhdukur dhe janë ose në Ekuador ose në Kolumbi ose në Dubai. Më i forti aty kam mbetur unë”- tha gazetari.
Ndër të tjera, Artan Hoxha kujtoi edhe shoqërimin në Prokurorinë e Durrësit në vitin 2016, menjëherë pasi ishte i ftuar në emisionin “Opinion”.
Teksa foli pa doreza, gazetari kujtoi sesi u shoqërua me makinën e Blendi Fevziut për të dëshmuar, ku tha se pati mundësinë të fshihte njërin nga celularët, pasi dy të tjerët iu sekuestruan për shumë kohë.
“Prokuroria e Krimeve të Rënda më bëri një favor. Meqenëse makina që kishte ardhur të më merrte nuk i plotësonte standardet e mia si anëtar I komisionit të krimit të organizuar,më lanë të udhëtoja me Audin 110 mijë eurosh të Fevzos. I dha vetë Fevzo makinës. Në sedijen e parë të pasagjerit ishte adashi im Artan Hoxha që ishte kandidat për president. Unë isha mbrapa dhe më lanë kohë të fshihja një nga telefonat, dy i dorëzova”- tha Artan Hoxha.
Asokohe, Prokuroria e Krimeve të Rënda i kërkoi Artan Hoxhës që të paraqitej pas një deklaratë në emision në lidhje me rrëzimin në grykëderdhjen e lumit Ishëm të avionit me drejtues një pilot Italian Guido Andrea Guidi.
