Muaj pas vdekjes misterioze të Joy Ayokos, Policia ka mundur të zbërthejë telefonin e kenianes që gjeti vdekjen në vendin tonë. Raportohet se janë përftuar biseda me interes, ku mes tyre është edhe komunikimi i Joy me Rodi Braçi, shoferin e kazinosë ku ajo punonte.
Komunikimet mësohet se kanë ndodhur edhe ditën e ngjarjes ndërsa të dhënat e përftuara ka shtyrë hetuesit të dyshojnë se fillimisht e reja është thirrur për të zbritur poshtë në hyrje të godinës së Hostelit ku qëndronte e më pas është dhunuar barbarisht. Më pas trupi i saj dyshohet të jetë marrë dhe është hedhur në pjesën e pasme të godinës.
Ky fakt ka përputhje me kqyrjen e vendit të ngjarjes dhe mënyrën se si është gjetur trupi i 22-vjeçares, ndërkohë që në dhunimin e saj dyshohet se janë përfshirë 5 persona. Hetuesit e kishin te pamundur për shumë kohë zbërthimin e telefonit të saj për shkak se kodi ishte ndërruar, duke bllokur hapjen e pajisjes.
Prej kohësh Policia ka marrë në pyetje disa persona, mes tyre shoqja e Joy-t dhe shoferi i kazinosë, Rodi Braçi. Ky i fundit që dyshohet të ketë pasur një marrëdhënie me të renë nga Kenia, mohon të ketë lidhje me vdekjen e saj.
Më herët nëna e Xhoit deklaroi se 4 ditë para ngjarjes ajo ka udhëtur me shoferin e kazinosë Rodi Braci për në Durrës. Ky i fundit kishte vazhduar t’i shprehte pëlqimin e tij të resë dhe i kishte qëndruar shumë pranë, gjë e cila kishte shqetësuar Joy-n. Këtë shqetësim, ajo ia kishte shprehur nënës së saj. Sipas nënës së të ndjerës, kjo e fundit kishte vënë re se po ndiqej vazhdimisht nga shoferi. Bëhet me dije se policia po punon edhe për rimarrjen në pyetje të shtetases keniane Emily Mutua, me të cilën Joy jetonte në Tiranë.
