Aktori Akil Varfi është larguar përfundimisht nga gara e “Ferma VIP 3”, në një mbrëmje plot tension, emocione dhe vendime të papritura që tronditën jo vetëm banorët, por edhe publikun.
Akili ishte në televotim që prej të premtes, së bashku me Indrin, Gresën dhe Fairfax, duke u përballur me një rrezik real për të lënë përfundimisht lojën. Fillimisht, publiku vendosi të shpëtojë Indrin, duke e nxjerrë nga rreziku dhe duke lënë në garë tre banorët e tjerë: Akilin, Gresën dhe Fairfax.
Për të vendosur fatin e tyre, produksioni organizoi një sfidë mes tyre. Në një kthesë të papritur, ishte pikërisht Akili ai që arriti të triumfonte i pari në këtë sfidë. Megjithatë, vendimi i tij për të mos e pranuar fitoren dhe për t’ia dhuruar atë Gresës habiti të gjithë. Ky gjest i pazakontë ndryshoi menjëherë rrjedhën e lojës, duke bërë që Akili dhe Fairfax të përballeshin në një televotim të drejtpërdrejtë, kokë më kokë, brenda të njëjtës mbrëmje.
Vendimi final i publikut ishte i prerë: Akil Varfi duhej të largohej nga “Ferma VIP 3”, duke i dhënë fund rrugëtimit të tij në këtë format dhe duke humbur mundësinë për të fituar çmimin e madh prej 200 mijë euro.
Mbrëmja nuk ishte pa polemika. Që në fillim, në qendër të diskutimeve ishte debati i fortë që Akili kishte pasur me Sarën, një përballje që duket se ndikoi edhe në rrjedhën e mëtejshme të ngjarjeve. Pas këtij momenti dhe shpëtimit të Indrit nga publiku, Akili madje kërkoi vetë të largohej nga gara, një veprim që u interpretua si një reagim emocional ndaj situatës.
Moderatorja ndërhyri për ta bindur të qëndronte dhe të vazhdonte garën, duke i dhënë një tjetër mundësi për të reflektuar. Megjithatë, vendimi përfundimtar i takoi publikut, i cili zgjodhi ta përjashtojë përfundimisht nga loja.
