“Grei”, shkruar nga E. L. James
Kristian Grei është një kontrollues i fiksuar i çdo detaji në jetën e tij. Ai jeton në një rregull absolut, në disiplinë të rreptë dhe brenda kornizave të boshatisura. Kjo gjendje zgjati derisa Anastasia Stilli rrëzohet pa dashur para këmbëve të tij. Ndryshon çdo gjë… Duar, dhe ekstremitete gjymtyrësh ngatërrohen zhurmshëm…. Dashuria e parë përtej kuriozitetit që mbushi kinematë në gjithë botën. Kristian është personazh i origjinalit: “50 hijet e Greit”. Një e kaluar që i ka lënë gjurmë, një situatë ndërpersonale që ngjalli reagim masiv. Disa e pëlqyen dhe nuk guxuan ta pranonin, të tjerë vijuan rrugën të qetë sikur të mos kishte ndodhur asgjë…
“E gjora vajzë e pasur” nga Lesley Lokko
Një prostitutë e bukur trazon jetën e një grupi vajzash. Tre shoqe të vjetra përballen me një vajzë që rruga e mundimshme e të mbijetuarit, e ka mbushur me mllef dhe hakmarrje. Niki, e bija e një miliarderi, ka nevojë për vëmendjen dhe dashurinë prindërore të të atit, Kerin, e varfra, me një familje problematike dhe shumë inteligjente dhe Tori, me një barrë kujtimesh të rënda mbi shpatulla, kryqëzohen me Stelën e bukur që njeh mirë epshin kafshëror të njerëzve. Ndaj kujt dëshiron të hakmerret Stela? Çfarë fsheh babai i pasur i Nikit? Një histori pasionesh dhe misteri që endet mes Londrës, Parisit dhe Zimbabves.
“Dashuria e jetës sime”, i autores Anna Premoli
Një grua që përvoja e punës e mëson të jetë “Ajo’. Medison fiton një mundësi për t’u profesionalizuar në një vend të huaj. Dukja është e bukur për ne që e shohim nga jashtë, por nuk është fare kështu për atë që deri vonë kishte shitur imazhin vetëm me fasadën dhe në fakt nuk ishte aspak e motivuar për të ndryshuar jetën e saj. Vegjetimi dhe rehatia kishin zënë shtresa. Tashmë ajo provon të jetojë me njerëz të huaj, gjithçka është ndryshe, deri tek ushqimi. Asaj i qëlloi të zhvendosej në Korenë e Jugut. Shefi i ri me tipare aziatike i shtroi një trase jo të butë… Medison përballë vetes. Ka plot surpriza dhe ndjesi të këndshme pozitiviteti në këtë libër të autores kroate, Anna Premoli e cila jeton në Itali. Ky roman pritet të kthehet në një projekt kinematografik.
“Rrëfenja e shërbëtores”, shkruar nga Margaret Atwood
Një system i tërë qeverisës i ngritur mbi shtypjen dhe çdo detaji të vendosur nën kontrollin e fizikut femëror. Rrëfenja reale, tepër të hidhura që dëshmojnë nënshtrimin e skajshëm dhe manipulimin e seksit femër. Etja për pushtet gërryen deri në palcë urinë për të sunduar në kurriz të tjerëve. Efrediti, është shërbyesja që vjen nga populli. Vlera e saj janë vezoret. Kompleks dhe harmoni brenda një njeriu që ka 4 palë sy dhe ndjesi të shumëfishta për atë që sheh dhe vuan. Nëpër faqe, teksa lexon pyet: “Ka vërtet emancipim të femrës?”. Margaret Eleanor Atwood është shkrimtare dhe ambientaliste kanadeze, fituese e çmimit “Princi i Asturias” për Letërsinë.
“Dopio gjashta”, letërsi shqipe nga Darien Levani
Paradoksi i njeriut në Shqipëri është burimi i një romani “giallo”. Levani sjell si personazh një ish-polic i cili si dedektiv privat e sheh veten në telashe. Ai është bërë pjesë e një rrethi të frikshëm korrupsioni. Bardhyl Nini, ndodhet mes dy zjarresh. Nga njëra anë është një grup brenda Policisë së Shtetit i ngarkuar me kapjen e kriminelëve të kërkuar nga “Interpoli”. Pikërisht këtu është zhdukur çdo lloj gjurme. Pala tjetër, është vënë në kërkim të drejtësisë. Po roli i Ninit?
Trending Now
