Deputeti Gjetan Gjetani ka folur për ndarjen nga jeta të vjehrrit Hasan Mira, 65-vjeçar, i cili u vetëhodh nga Sanatoriumi, pas infektimit me koronavirus.
Sipas deputetit, i moshuari gëzonte një shëndet shumë të mirë dhe e ka kuptuar me shumë vonesë se ishte i prekur me COVID-19.
Ai thotë se mjekët janë heronj, por duhet të merren masa për persona me probleme të tilla pmendore dhe psikologjike, në mënyrë që të mos shtrohen në katin e katërt të spitalit.
“Ishte një rrufe në qiell të hapur. Gëzonte një shëndet shumë të mirë. Nga sa më kanë thënë mjekët, kishte mbi dy javë i infektuar. Ka pasur një fizik shumë të mirë dhe nuk e ka kuptuar sëmundje. Sipas mjekëve është konstatuar shumë vonë. Për shërbimin e mjekëve nuk kam asnjë ankesë, por të themi realitetin dhe të jemi të sinqertë nga ana e qeverisë ka shumë mangësi. Në Sanatorium nuk ka një psikiatër, njerëzit me probleme të tilla nuk mund të shtrohen në katin e katërt. Duhet të merren masa që persona me probleme të tilla të shtrohen në katin e parë. Ishte në një gjendje të mirë shëndetësore, COVID-19 nuk e ka kuptuar fare, kishte mbi dy javë. Doktorët e Burrelit nuk e kanë zbuluar këtë sëmundje. Por kur ka bërë një vizitë në Sanatorium është konstatuar me koronavirus”, u shpreh ai.
Mjekët kanë thënë që COVID-19 i ka shkaktuar dëmtime në tru?
Gjetani: Sipas mjekëve COVID-19 godet organizmin njeriut në pikën më të dobët. Ka persona që i ka goditur në mushkëri. Në rastin konkret i ka goditur sistemin nervor. Kur unë e kam takuar ka qenë shumë mirë, nuk arrita ta besoj. Në spital kam hyrë, e kam parë me sytë e mi, kam parë edhe angazhimin e përkushtuar të mjekëve. Janë vërtet heronj, pasi përballen edhe me problemet e qytetarëve.
Kishte shfaqur shenja agresiviteti më parë?
Gjetani: Jo, vetëm të mërkurën në mëngjes i ka shfaqur këto probleme.
/ABC News
