Pas koncertit në Tiranë, reperi Daddy Yankee po vijon turin e tij të performancave nëpër Europë. Ndalesa e rradhës ishte në Spanjë dhe nuk ishte një eksperiencë e mirë për këngëtarin e hitit “Gasolina”, pasi hajdutët morën më shumë se dy milionë dollarë bizhuteri nga dhoma e tij e hotelit.
Sipas “Las Provincias”, hajduti ka bindur stafin se ishte reperi Daddy Yankee dhe ata i kanë hapur derën e suitës ku qëndronte këngëtari i hitit “Despacito” si dhe kasafortën. Dhe fare lehtë, ai arriti të grabiste rreth 2 milionë dollarë bizhuteri, përfshirë këtu diamantë dhe flori, si dhe 2500 dollarë para cash nga hoteli Melía Valencia.
Zyra për shtyp e këngëtarit ka njoftuar ngjarjen dhe ka bërë të ditur se kanë punësuar një kompani private që do të zbardhë detajet e kësaj çështje. Ndërkohë që raportohet se hajduti ka përdorur dorashka dhe do të jetë e vështirë për të zbuluar identitetin e tij, pasi ishte transformuar si reperi.
