Një tjetër moshë e re është bërë viktima më e fundit e koronavirusit në vend!
Bëhet fjalë për një 28-vjeçar nga Shkodra me profesion elektriçist, i cili ka ndërruar jetë pas infektimit me COVID-19.
Lajmin e ka bërë me dije faqja në Facebook e OSHEE Shkodër, e cila i ka shprehur ngushëllimet familjes për këtë humbje të madhe.
“Virusi nuk njeh moshë, aq më tepër profesion… Padrejtësisht i mori jetën kolegut tonë, elektricistit 28-vjeçar, Anton Çuni. Me hidhërim të madh, të pikëlluar, i shprehim ngushellime të sinqerta familjes, të afërme dhe miqve ? U prehtë në paqe?”, shkruhen në faqen zyrtare të OSHEE-së.
Deri më tani Ministria e Shëndetësisë nuk ka njoftuar ende për vdekjen e tij dhe nëse ka pasur sëmundje shoqëruese.
Pak më parë gjatë ditës ministria konfirmoi vdekjen e mjekut Anibal Byberi, i cili ishte infektuar me COVID-19.
Në një njoftim për shtyp, ministria theksoi se mjeku ishte konfirmuar pozitiv prej disa ditësh dhe vijonte trajtimin në banesë, ndërsa një ditë më parë u paraqitur në gjendje të rëndë në spitalin “Shefqet Ndroqi”.
Sipas njoftimit, Byberi nuk ka mundur të mbijetojë si pasojë e insuficencës së rëndë respiratore. Ai vuante nga obeziteti dhe psoriasis një sëmundje e lëkurës.
“Mjeku pneumolog 53 vjeçar, me origjinë nga Tropoja është konfirmuar pozitiv me virusin e rrezikshëm pak ditë më parë dhe vijonte trajtimin në banesë. Pas rëndimit të gjendjes shëndetësore, mjeku Byberi është paraqitur në Urgjencën e Spitalit Universitar “Shefqet Ndroqi”, ku pavarësisht ndihmës së menjëhershme të ofruar nga stafi mjekësor, fatkeqësisht nuk ka mundur të mbijetojë si pasojë e insuficencës së rëndë respiratore. Mjeku Anibal Byberi vuante nga psoriasis, një sëmundje lëkure dhe obeziteti. Pas shumë vitesh punë në vendlindjen e tij, ka punuar për disa kohë si mjek në burgun 302, ndërsa aktualisht nuk ishte në punë, ndërsa këto ditë do të konkurronte në portalin “Mjekë për Shqipërinë”, shkruan Ministria e Shëndetësisë.
