“Iconstyle.al” ka denoncuar prej muajsh veprimtarinë e kompanisë celulare Vodafone, e cila përdor pa të drejtë të dhënat personale të klientëve dhe ish-klientëve të saj për qëllime marketingu.
Shkeljet e kësaj kompanie janë të shumta, por kësaj here po vendosin në rrezik jetën e qytetarëve.
Kompania Vodafone po zhvillon në Sarandë një koncert shumë të madh në kundërshtim me masat e marra anti-Covid, ndërkohë që rreziku i variantit të ri “Delta” sa vjen e po rritet në vendin tonë.
Siç shihet nga videot, numri i pjesëmarrësve në këtë event të zhvilluar në qytetin e Sarandës është mjaft i lartë në një kohë që nuk lejohen grumbullime me më shumë se 50 persona në ambientet e jashtme.
“Lejimi i konferencave, eventeve, trajnimeve, seminareve, takimeve etj… në rast të përmbushjes së kritereve për hapësirat rekomandohet të zhvillohen:
Zhvillimi i konferencave / eventeve aty ku është e mundur në sallat që mund të lejojnë distancimin fizik ose të zhvillohen në ambjente të hapur deri në 50 persona.
Rekomandohet që ulja e pjesmarresve të jete e tillë që të respektojë masat e aprovuar nga MSHMS”, thuhet në protokollin e IShP-së.
Edhe pse ditët e fundit në vendin tonë ka pasur një rritje të frikshme të rasteve me Covid-19 si pasojë e variantit të ri “Delta”, duket se as kjo nuk e pengon “Vodafone”.
Në një rast të tillë, ku shkelja e masave të vendosuara nga vetë IShP është mëse e qartë, kjo kompani celulare duhet të përballet me forcën e ligjit dhe ndëshkimin me gjobë nga autoritetet përgjegjëse.
Kujtojmë se ditën e sotme Shqipëria ka regjistruar për të dytën ditë radhazi mbi 900 raste të reja infektimi në ditë me COVID-19. Ndryshe nga dita e djeshme, sot janë 16 raste më pak, 905 ndërkohë që 3 pacientë nga Tirana e Elbasani kanë humbur jetën.
