Vijon të rritet ndjeshëm numri i viktimave nga Covid-19, pasi një tjetër pacient ka ndërruar jetë pasditen e sotme te spitali Infektiv.
Ministria e Shëndetësisë ka njoftuar se ka humbur jetën një 69-vjeçar nga Shkodra, i cili prej 10 ditësh ishte në gjendje të rëndë.
Nw njoftim thuhet se 69-vjeçari, përveç virusit, vuante edhe nga hipertensioni dhe për shkak të gjendjes së rënduar nuk ka mundur të mbijetojë.
“Gjendja e tij është përkeqësuar si pasojë e vështirësisë në frymëmarrje dhe pavarësisht terapisë intensive medikamentoze dhe kujdesit të stafit mjekësor, 69-vjeçari, i cili vuante nga hipertensioni, nuk ka mundur të mbijetojë. Që nga fillimi i epidemisë, 59 qytetarë e kanë humbur betejën me COVID19, ndërsa vijon të ketë raste të rënda që po trajtohen në shërbimin infektiv. Ministria e Shëndetësisë dhe Mbrojtjes Sociale apelon qytetarët të tregojnë kujdes, të mbajnë maskën dhe të respektojnë distancën nga njëri-tjetri si dhe bizneset të respektojnë me rigorozitet protokollet e sigurisë, për të ruajtur shëndetin e qytetarëve,”-njofton Ministria.
Situata nga koronavirusi është rënduar, pasi kjo është dita e dytë që brenda ditës shënohen tre viktima. Bilanc i njëjtë u shënua edhe ditën e djeshme.
Numri në total i viktimave në vend ka shkuar në 59, ndërsa ministria e Shëndetësisë u bën apel qytetarëve të mbajnë maskë dhe të respektojnë distancën nga njëri-tjetri.
