Gazetarja e Ora News e cila intervistoi një nxënës pas provimit të maturës, pa e ditur që ishte autik, kërkoi falje për videon e tij që u bë virale.
Anxhela Celibashi ishte prezente në Shkollën “Ismail Qemali” në Tiranë për të përcjellë live emocionet e maturantëve pas përfundimit të provimit.
Ajo mundi të intervistonte një djalë i cili me shumë sinqeritet tregoi se gjysmën e pyetjeve i kishte bërë vetë dhe një pjesë e kishin ndihmuar. Videoja e tij u bë shumë shpejt virale në rrjetet sociale, pa e ditur askush se djali ishte i spektrit autik.
Duke apeluar për fshirjen e videos, sot gazetarja u kërkoi ndjesë të madhe publike familjarëve të tij pasi tha se nuk e kishte ditur aspak që ai ishte autik.
“Ishim live dhe maturanti i cili foli dhe video e tij u bë virale, ishte mes grumbullit dhe numërit të konsiderueshëm të maturantëve dhe ishte i vetmi në fakt që pranoi të flise live. Unë nuk e dija që djali ishte i spektrit autik, për këtë i kërkoj falje të gjithë familjarëve të tij, i kërkoj atij falje publikisht, shkollës dhe kujdo që mund të jetë prekur nga ajo video për të cilën unë aspak nuk u ndjeva mirë dhe prej momentit të parë që mora vesh se djali ishte i spektrit autik, po bëj përpjekje ta fshirë atë video nga rrjetet sociale. Në fakt ai nuk duhet që të dilte live pa patur pranë kujdestarin apo edhe prindin edhe për këtë arsye u ndjeva shumë keq dhe përsëri i kërkoj falje familjarëve”.
Pas transmetimit live, ajo video nuk ekziston në asnjë platformë online të televizionit Ora News, ndaj mesazhi i gazetares është që çdokush të solidarizohet me apelin për ta fshirë nga çdo rrjet social këtë video.
