Rritja e numrit të të infektuarve ditorë i cili sot shkoi në 44, nuk është një shqetësim sipas mjekut Infeksionist Pëllumb Pipero, por shtimi i rasteve tek Infektivi po.
Në një prononcim për iconstyle.al, Pipero tregoi arsyen kryesore sipas tij, që ka ndikuar në shtimin e rasteve të infeksioneve, dhe që lidhet kryesisht me një lloj shkujdesjeje pas lehtësimit të masave, jo vetëm nga qytetarët por edhe nga bluzat e bardha.
“Ishte e pritshme që mbas lirimit gradual të masave kufizuese do të kishte një shtim të rasteve relative pozitive, të cilat nuk janë shqetësim, por rastet e shtruara në spital janë problem. Është një fenomen që nuk ka ndodhur vetëm tek ne, ka ndodhur edhe në rajon, si Maqedonia, dhe po analizohen e do të analizohen. Arsyeja kryesore për shtimin e rasteve është një lloj shkujdesjeje midis bluzave të bardha edhe mes qytetarëve në raport me mënyrën sesi e kemi kuptuar ne heqjen e masave, pasi heqja e masave nuk do të thotë se virusi ka ikur. Ndaj dhe kemi rekomanduar se duhet medoemos të vijojë kujdesi, të kemi në kujdes distancën fizike, vendosjen e maskës në mjedise publike dhe higjienën e duarve”.
Por në kushtet që jemi a duhet të hapet transporti urban dhe ndërurban, i cili është parashikuar të nisë më datë 15 qershor?
Pipero u shpreh se transporti është i nevojshëm dhe duhet të nisë, me kushtin e vetëm që të respektohen rregullat dhe protokolli i sigurisë:
“Transporti publik është i domosdoshëm. Një grup specialistësh po punon për të, duhet të hapet por me kusht që të respektohen protokollet. Nëse masat shtrënguese që u morën në kohën e duhur dhe ishin shtrënguese por jo ekstreme, u liruan, pritshmëria është të kemi shtim të rasteve sepse shtohet mundësia e ekspozimit”.
Pyetja që i shqetëson të gjithë është “A do të kemi një valë të dytë virusi?” dhe për këtë mjeku u shpreh skeptik në kuptimin e kthimit të virusit “klasik”, i cili shkaktoi mbi 400 mijë viktima dhe mbi 7 milionë të prekur në mbarë botën.
Ndërkohë që OBSH thotë se do të ketë valë të dytë në vendet ku janë ulur shifrat e të prekurve, për Piperon kjo nuk dihet me siguri dhe gjasat më të mëdha janë që të kemi një bashkëjetesë me virusin ose vijimësi me të për një kohë të gjatë;
“Askush nuk mund ta parashikojë saktë, mendimet janë të dyzuara, nuk do të kemi një rikthim të valës së këtij virusi në kuptimin klasik, e shumta një bashkëjetesë ose vijimësi me këtë virus për një kohë të gjatë, por virusi vjen duke u dobësuar. Duke qenë se ende nuk kemi një vaksinë ose mjekim adekuat do të prevalojnë masat parandaluese. Në opinionin tim nuk do të kemi një valë të dytë klasike. Indikatori kryesor është se nuk ka ndryshime gjenetike të virusit, dhe nëse nuk do të kemi ndryshime të tilla, nuk do të kemi valë të dytë”.
Por edhe nëse do të ketë, gjë që nuk përjashtohet, impakti sipas Piperos duhet të jetë shumë herë më i paktë për shumë arsye si: një pjesë e popullit ka rënë në kontakt, kapacitetet shëndetësore janë më të rritura dhe ndërgjegjësimi i qytetarëve është më adekuat.
Aktualisht gjendja e të shtruarve në spital është relativisht e mirë dhe e qëndrueshme, ndërsa problem mbeten 6-7 raste të reja që janë në terapi intensive,
“Në këto kushte për sa kohë virusi është në qarkullim, për sa kohë nuk kemi mjakim racional, ju bëj apel qytetarëve të respektojnë distancën fizike, vendosjen e maskës në vende publike dhe kujdes për larjen e duarve. Maska në mjedise publike dhe ku s’ka distancë është e domosdoshme”, theksoi Pipero për “iconstyle.al”.
