Gruaja më e pasur në botë u nda nga jeta në moshën 94-vjeçare. Trashëgimtarja e kompanisë L’Oreal, Liliane Bettencourt, vdiq pas një beteje shumëvjeçare nga sëmundja e Alzhaimer-it (që nga viti 2006). Lajmi u bë publik nga familja e saj të enjten.
“Liliane Bettencourt vdiq mbrëmë në shtëpi”, tha në një prononcim publik e bija, Francoise Bettencourt Meyers: “Nëna ime u largua paqësisht.”
Bettencourt ishte në listën e 14 njerëzve më të pasur në botë, sipas revistës “Forbes”, dhe fitimet e saj deri në muajin mars shkonin në 39.5 miliardë dollarë (33 miliardë euro).
Siç mësohet, ajo është parë shumë rrallë në publik që kur la bordin e L’Oreal në vitin 2012, por emri i saj, megjithatë, mbeti në listën e njerëzve më të pasur.
