Të tjera detaje kanë dalë në dritë lidhur me kenianen Joyce Achieng Aoko, e cila dergjej në spitalin e Traumës. E reja u dhunua barbarisht dhe u gjet poshtë ballkonit të shtëpisë së saj.
Tashmë mësohet se Joy ka dalë nga koma por është në gjendje vegjetative, që do të thotë ndryshe si “zgjimi pa vetëdije”.
Mjeku Agron Xheta ka dhënë disa detaje për “Express”.
“Koma mund të jetë reversible kur mund të kthehet dhe ireversible kur nuk kthehet, në këtë rast është vegetative ku truri nuk funksionon dhe vetëm zemra funksionon, por kanë humbur funksionet e njohjes. Pacienti mund të ushqehet, të jetojë por nuk njeh, nuk komunikon, kjo është koma vegetative. Për hollësi në lidhje me rastin tuaj, duhet komunikuar me mjekun përgjegjës që ndjek pacientin”, theksoi ai.
Sa i takon ngjarjes dhe dhunës barbare ndaj të resë, ende nuk është gjetur ndonjë autor.
Ja ç’deklaron Prokuroria e Tiranës:
“Në përgjigje të kërkesës tuaj të datës 11.12.2022, ku kërkoni informacion në lidhje me çështjen e shtetases J.A.A (shtetase keniane), ju bëjmë me dije se: Prokuroria pranë Gjykatës së Shkallës së Parë ka regjistruar procedimi penal nr.6718 i vitit 2022, për veprën penale “Plagosja e rëndë me dashje”, parashikuar nga neni 88 i Kodit Penal. Duke qenë se dosja është ende në hetim, informacion më i detajuar nuk mund t’u jepet për shkak të respektimit të sekretit hetimor”.
