Pak ditë më parë, Iconstyle.al solli në vëmendje rastin e një vajze shqiptare që ishte bazuar në një artikull në internet për përdorimin e uthullës së mollës.
Vajza kishte një pikë të bardhë poshtë vetullës që mendoi ta hiqte duke lexuar këshillat e një portali shqiptar për uthullën e mollës.
Por në vend që ta largonte pikën e vogël, ajo u përball me një reaksion të frikshëm që i çoi në ënjte, djegie dhe irritim të lëkurës nga përdorimi i uthullës së mollës.
Rasti u trajtua në Iconstyle.al dhe tërhoqi vëmendjen e lexueseve tona, mes të cilave edhe disa prej vajzave që e kanë përdorur trajtimin e fytyrës me uthull molle. Sipas Enildës, uthulla e mollës është një tonifikues shumë i mirë për fytyrën, por duhet të dish ta përdorësh si duhet.
E rëndësishme është të dish masën e përzierjes së uthullës me ujë, pasi ashtu siç e trajtuam në artikullin e parë (Lexo Këtu) uthulla duhet holluar, veçanërisht nga ata persona që kanë një lëkurë të ndjeshme.
Si ta përdor uthullën e mollës?
Enilda ka ndarë për lexueset e Iconstyle.al, eksperiencën e saj me përdorimin e uthullës së mollës, që besojmë se do të jetë shumë e vlefshme:
“Uthulla e mollës është shumë e mirë dhe shumë efikase për fytyrën por duhet të dish ta përdorësh. Duhet të dish masën e përzierjes së uthullës me ujë që është raporti 1 me 3 ( 1 uthull/3 ujë), duhet të dish formën e aplikimit që bëhet nëpërmjet tamponëve të pambukut dhe sigurisht para se ta përdorësh duhet të besh një vizite te dermatologu sepse nuk përdoret për çdo gjë. Unë e përdor me këshillë dermatologu në formë toniku dhe është super!
Duhet të dini që zona rreth syve dhe buzëve është shume e ndjeshme aq sa edhe shumica e produkteve kozmetike dhe bimore nuk sugjerohen në ato zona.
Un jam vizituar në një dermatolog. Nuk kam pasur probleme me aknet po për shkak të përdorimit të shpeshtë të scrub-it prisha pH (pihashin) e fytyrës dhe fytyra ime ishte shumë, ekstrem e thatë. Pas vizitës përveç kremit hidratues më këshilluan të përdor si tonik uthullën e mollës të përzier me ujë sigurisht, 1 me 3 dhe mjaltë. Për 2 muaj përdorim pashë rezultate shumë të mira dhe fytyra filloi të vinte në vete”.
