Interneti dhe mediat online janë kthyer sot në udhëzuesin tonë kryesor sa i përket kujdesit për shëndetin, marrëdhëniet shoqërore, veshjen dhe stilin. Por ndodh që rezultati i të bërit të një gjëje “siç e ke lexuar”, nuk është ai që prisje.
Kështu i ka ndodhur një “influencer” shqiptare e cila, për të zhdukur një pikë të bardhë në fytyrë, u bazua në një shkrim që kishte lexuar në një portal shqiptar për uthullën e mollës.
Enki Çokaj ka ndarë me fansat e saj në Instagram, pasojat e përdorimit të uthullës së mollës në fytyrën e saj, për t’i paralajmëruar që të mos u kenë besim atyre që lexojnë.
Në vend që të largonte një pikë të vogël të bardhë që kishte poshtë vetullës, ajo u përball me një reaksion të frikshëm që i çoi në ënjte, djegie dhe irritim të lëkurës nga përdorimi i uthullës së mollës.
“Ky është rezultati pas leximit në një artikulli në internet, se për heqjen e pikave të bardha duhet të përdorni uthull molle. Më shqetësonte një pikë e vogël që më kishte dalë poshtë vetullës dhe thashë po provoj nga këto gjërat “në kushte shtëpie”. Rezultati ishte i tmerrshëm, mu ënjt gjithë syri, kam një orë që mbaj akull, mu skuq, më djeg dhe më është irrituar lëkura. Po e ndaj me ju për t’ju thënë MOS E PROVONI! Shumica e këtyre mediave online tek ne që na mbahen për serioze postojnë budallallëqe”, shkruan Enki.
Por a është në fakt uthulla e mollës një zgjidhje e mirë për shëndetin e lëkurës?
Ajo që duhet të dimë në fillim është çfarë është uthulla.
Uthulla e mollës dhe uthulla e bardhë janë dy gjëra krejt të ndryshme. Të dyja janë mjaft të dobishme në gatim, për kurë mjekësore, apo përdorime vetjake nga më të ndryshmet.
Uthulla e mollës dhe ajo e bardhë përdoren kryesisht në gatim, kujdes personal dhe për ambientet e brendshme. Fjala vinegar (uthull) vjen nga frëngjishtja që do të thotë “verë e thartuar”. Uthulla e mollës ka përdorim personal, ndërkohë që uthulla e bardhë përdoret kryesisht për pastrim.
Prej kohësh uthulla e bardhë e njohur si “Vinegar”, është përdorur si një antiseptik i fuqishëm për trajtimin e akneve. Ajo ka një numër të madh përdorimesh si për shërimin e djegieve, rritjen e flokëve, aromatizues dhe shumë të tjera.
Megjithatë, para se ta përdorni uthullën e mollës në fytyrën tuaj, duhet të dini se si do të reagojë lëkura juaj ndaj saj.
Dermatologët sugjerojnë përdorimin e saj fillimisht në një pjesë jo dhe aq të ndjeshme të lëkurës. Nëse nuk shihni ndonjë efekt sipërfaqësor, atëherë rekomandohet hollimi i uthullës për personat që kanë një fytyrë të ndjeshme, në mënyrë që të parandalojnë acarimin e tepërt të lëkurës.
Pjesa rreth syve apo në fytyrë si në rastin që trajtuam më sipër, është ajo me delikate ndaj edhe duhet bërë kujdes. Paraprakisht mund të konsultoheni me një dermatolog nëse keni një lëkurë të ndjeshme.
