Shumë prej nesh, pas një dite të gjatë pune, ndihen të lodhur dhe të uritur dhe shpesh zgjedhin të hanë tepricat e një dite më parë. Megjithatë, ekspertët e sigurisë ushqimore paralajmërojnë se ringrohja e ushqimeve mund të jetë e rrezikshme nëse nuk bëhet siç duhet.
Një nga ushqimet më të rrezikshme për t’u konsumuar pas disa orësh është orizi i gatuar, i cili mund të mbajë baktere patogjene edhe pas zierjes. Sipas Benjamin Chapman, ekspert i sigurisë ushqimore në Universitetin e Karolinës së Veriut, mikrobet mund të shumohen shpejt në oriz që mbahet në temperaturë ambienti. Edhe nëse e ringrohni, nuk ka gjithmonë garanci që të gjitha bakteret janë shkatërruar, duke rritur rrezikun për helmim nga ushqimi.
Për të shmangur problemet, Chapman rekomandon që orizi i gatshëm të ruhet menjëherë në frigorifer dhe të ringrohet vetëm një herë, duke siguruar që të arrijë temperaturën e duhur gjatë ngrohjes. Shumë ekspertë sugjerojnë gjithashtu të mos ruani ushqime të gatuara për më shumë se një ditë, veçanërisht ato që përmbajnë niseshte si orizi ose patatet, pasi mund të favorizojnë zhvillimin e baktereve si Bacillus cereus, të cilat shkaktojnë të vjella dhe diarre.
Në vend që të rrezikoni shëndetin, mendoni të përgatisni një vakti të freskët ose të siguroheni që ushqimi i djeshëm është ruajtur dhe ngrohur siç duhet. Kujdesi ndaj higjienës ushqimore është veçanërisht i rëndësishëm për të shmangur helmimet që mund të shfaqen papritur, edhe nga ushqime që duket se janë të sigurta.
