Javën e kaluar u bë e ditur se në mesin e të infektuarve me koronavirus në Shqipëri ishte edhe djali i deputetes socialiste, Antoneta Dhima.
Ai rezultoi pozitiv në testin e virusit vdekjeprurës Covid-19. Por sot deputetja ka dhënë një lajm të mirë për të birin në moshën 26-vjeçare.
Ajo shprehet se ai e mposhti “armikun e padukshëm”, ndërsa ka falenderuar bluzat e bardha për mbështetjen gjatë kësaj periudhe.
Dhima shton se edhe pse nuk zgjodhi ta jepte lajmin për infektimin e të birit, ajo është shumë e lumtur që tani i uron atij shëndet dhe jetë.
Postimi i plotë në Facebook:
E lumtur dhe e gëzuar që biri im e mposhti armikun e padukshëm, atë armik me të cilin shumë të tjerë po vijojnë betejën.
Falenderimet shkojnë për të gjitha bluzat e bardha, mjekët, infermierët, epidemiologët, imazheristët, laborantët dhe stafet mbështetëse, në Fier, Tiranë e kudo. Jeni ju që luftoni në frontin e parë të kësaj lufte globale, një lufte që me këmbëngulje e forcë ne do ta fitojmë.
Edhe pse nuk zgjodha të jepja lajmin për nisjen e kësaj lufte, jam e ngazëllyer që tani i uroj tim biri shëndet dhe jetë, dhe po i njejti urim shkon për të gjithë Ju, që vazhdoni të kuroheni nga ky virus, që nuk zgjedh, duke na kujtuar se të gjithë jemi të barabartë.
Faleminderit të gjithëve për sakrificën e pamasë që bëni në këtë periudhë të vështirë.
Qofshi të bekur të gjithë Ju që mjeksinë nuk e keni thjesht një profesion, por një mision që ju vendos përditë përballë sfidave, edhe të panjohura.
Faleminderit edhe të gjithëve Ju miq dhe mikesha që në këto ditë të vështira më qëndruat pranë me mesazhet e telefonatat Tuaja, duke treguar se miqtë më të mirë, janë ata që nuk të harrojnë në ditë të vështira.
Ne vazhdojmë të qëndrojmë në shtëpi, ndaj bëjeni edhe Ju.
Dhe kujtoni, që vetëm bashkë do tja dalim.
