Merviol Bilo, komandoja që dyshohet se ka qëlluar për vdekje Fabiol Gaxhan dhe ka plagosur rëndë Elion Haton dhe Ervis Martinajn, po planifikon të dorëzohet në policinë e Tiranës.
“Shqiptarja.com” shkruan sot se Bilo ka kontraktuar një avokat dhe është pikërisht ky person që po negocion me prokurorinë, për të realizuar vetëdorëzimin e komandos.
Në disa memo, të dërguara në prokurori nga avokati i Bilos, pretendohet se Merviol Bilo, ditën e ngjarjes nuk ka pasur asnjë armë me vete, por pistoletën pretendohet se ia ka marrë Redi Popeskut, i cili e dispononte me leje nga organet e Policisë.
Ky i fundit, pronar i lokalit ku ndodhi vrasja, u arrestua dhe më pas u lirua nga gjykata pas akuzës se ka fshehur provat për zbulimin e të vërtetës.
Prokuroria kërkoi dje “arrest me burg” për Popeskun, por gjykata vendosi ta lërë të lirë duke i dhënë masën e sigurisë “arrest shtëpie”.
Redi Popesku akuzohet se fshehu armën e Ervis Martinaj, si dhe dha dëshmi të rreme.
