Konflikti mes Izraelit dhe Iranit po përshkallëzohet ndërsa tashmë ka hyrë në ditën e shtatë, me sulme ajrore nga Izraeli dhe kundërpërgjigje me raketa nga Irani. Izraeli ka dhënë paralajmërime të reja për evakuimin e zonës pranë reaktorit të ujit të rëndë në Arak, Iran, duke publikuar edhe një imazh satelitor të zonës së rrezikuar.
Sipas raportimeve nga mediat amerikane, Presidenti Donald Trump ka miratuar planet për një sulm të mundshëm ndaj Iranit, por po shtyn vendimin final në pritje të një lëvizjeje nga ana e Iranit për të tërhequr programin e tij bërthamor dhe për t’u dorëzuar ndaj kërkesave të SHBA-së.
Në një deklaratë të fundit, Trump u shpreh në mënyrë të paqartë për pjesëmarrjen e SHBA-së në sulmet kundër Iranit: “Mund ta bëj, mund edhe të mos e bëj.” Ai nuk përjashtoi mundësinë e një atentati ndaj Liderit Suprem iranian, Ayatollah Ali Khamenei, duke thënë se SHBA-ja e di vendndodhjen e tij, por “për tani” nuk dëshiron ta vrasë.
Në një mesazh të regjistruar, Khamenei refuzoi të dorëzohet dhe kërcënoi me “operacion ndëshkues” të ashpër ndaj Izraelit, duke garantuar vazhdimësi në sulmet ndaj këtij shteti.
Në orët e para të ditës së enjte, ushtria izraelite paralajmëroi banorët e zonës së reaktorit në Arak të largohen menjëherë. Postimi në rrjetin social X përmbante edhe një foto satelitore me zonën e rrethuar me të kuqe, shenjë që paraprin një sulm.
