Vetëm tre ditë më parë në një parking makinash në Itali u gjet një foshnjë e pajetë. Ajo ishte lindur në shtëpi nga nëna e saj 27-vjeçare, Giorgina Guglielmi dhe menjëherë pasi e kishte sjellë në jetë ajo e kishte futur në një qese dhe e kishte hedhur në parking.
“Unë nuk e kam vrarë djalin tim, e kam braktisur, por nuk kam dashur që ai të vdesë”, ka thënë 27-vjeçarja nga burgu Capanne i Perugias, e arrestuar me akuzën e vrasjes me paramendim të djalit të saj të cilin e kishte me partnerin shqiptar.
Georgina gjatë dëshmisë së saj në polici ka treguar se jeton në kushte të vështira ekonomike dhe për këtë arsye nuk mund ta mbante fëmijën. Mirëpo këto të dhëna janë hedhur poshtë nga autoritetet, të cilat pretendojnë se ajo mund të mbështetej tek familja e saj, partneri shqiptar me të cilin ka edhe një vajzë 2 vjeçe, nga prindërit dhe vjehrrit, të cilët ishin në gjendje që ta ndihmonin edhe ekonomikisht.
Është mësuar se 27-vjeçarja e kishte mbajtur të fshehtë shtatzëninë gjatë gjithë kohës duke mos i treguar as prindërve të saj dhe as partnerit të saj shqiptar, i cili është me profesion murator.
Burimi: Panorama
