Një ngjarje e rëndë ka tronditur qytetin San Cristóbal në provincën Santa Fe, ku një nxënës 15-vjeçar hapi zjarr brenda Shkollës Pedagogjike “Mariano Moreno N°40”, duke shkaktuar vdekjen e një 13-vjeçari dhe plagosjen e të paktën tetë të tjerëve. Sulmi ndodhi rreth orës 07:15, gjatë ceremonisë së ngritjes së flamurit, ndërsa nxënësit ishin të mbledhur në ambientet e shkollës.
Autoritetet raportojnë se i riu nxori një armë nga çanta, që dyshohet të ishte fshehur në një kuti kitare, dhe qëlloi disa herë drejt bashkëmoshatarëve para se të neutralizohej dhe arrestohej nga policia. Dy nga të plagosurit janë në gjendje më të rëndë dhe u dërguan për trajtim të specializuar, ndërsa të tjerët pësuan lëndime gjatë përpjekjes për t’u larguar në panik. Burime mjekësore bëjnë me dije se jeta e tyre nuk është në rrezik.
Motivet e sulmit nuk janë ende të qarta, por autoritetet po hetojnë të gjitha mundësitë, duke përfshirë edhe lidhjen me bullizmin. Dëshmitarët përshkruajnë momente paniku dhe frike: “Pamë një djalë që doli nga tualeti me armë dhe filloi të qëllonte. Të gjithë nisëm të vraponim,” tregoi një nxënëse për mediat lokale.
Guvernatori i Santa Fe, Maximiliano Pullaro, e quajti ngjarjen “të paprecedentë” për rajonin. Autoritetet shpallën dy ditë zie dhe pezulluan mësimin, ndërsa shkolla do të qëndrojë e mbyllur. Ngjarja ka tronditur thellë komunitetin, ndërsa hetimet vazhdojnë për të zbardhur plotësisht rrethanat e sulmit. Sulme të tilla janë jashtëzakonisht të rralla në Argjentinë, me rastin më të rëndë të regjistruar në vitin 2004 në Carmen de Patagones.
