Një ngjarje tragjike ka ndodhur në aeroportin Orio al Serio të Milanos, ku një burrë ka humbur jetën pasi u përplas me motorin e një aeroplani që po nisej drejt Spanjës.
Sipas mediave italiane, incidenti ndodhi të martën në mëngjes, kur avioni po largohej nga stacioni i uljes dhe po përgatitej për ngritje me destinacion Asturias, në veriperëndim të Spanjës. Në rrethana ende të paqarta, burri dyshohet se ka hyrë në pistë dhe është përplasur fatalisht me motorin e avionit.
Gazeta Corriere della Sera raporton se burri arriti të hyjë në pistë nga jashtë territorit të aeroportit, duke anashkaluar sigurinë. Autoritetet kanë nisur një hetim të thelluar për të zbardhur sesi ndodhi kjo shkelje e rëndë e protokolleve të sigurisë.
Për pasojë, fluturimet në aeroportin e Bergamos u pezulluan përkohësisht, por u rifilluan pas mesditës së të martës.
Ngjarja ka tronditur opinionin publik dhe ka ngritur pikëpyetje serioze për sigurinë në një nga aeroportet më të ngarkuara të Italisë.
