Një traget me dhjetëra pasagjerë është përmbysur mbrëmjen e së mërkurës në ujërat mes Javas dhe Balit, duke shkaktuar një tragjedi detare me të paktën katër viktima të konfirmuara dhe dhjetëra të shpëtuar.
Mjeti ishte nisur nga porti Ketapang rreth orës 23:00, në një udhëtim të shkurtër prej vetëm 50 kilometrash drejt Balit, por gjithçka mori fund vetëm 30 minuta më pas, kur u fundos në mes të detit.
Sipas autoriteteve të shpëtimit në Surabaya, në bord ndodheshin 53 pasagjerë dhe 12 anëtarë ekuipazhi. Dyshohet se një rrjedhje në dhomën e motorit ka qenë shkaku kryesor i përmbysjes, por hetimet janë ende në fazë të hershme.
Operacionet e kërkim-shpëtimit po vazhdojnë edhe sot, me nëntë mjete detare të përfshira, përfshirë anije, rimorkiatorë dhe ndihmën e peshkatarëve vendas. Natën, errësira dhe dallgët deri në 2 metra kanë vështirësuar çdo përpjekje për ndërhyrje, por mëngjesi solli përmirësim të kushteve në det, duke shtuar shpresat për të gjetur të mbijetuar të tjerë.
Ende nuk ka të dhëna nëse mes personave në bord ndodheshin turistë të huaj.
