Një ngjarje e rëndë ka goditur komunitetin e West Yorkshire në Angli, ku një zjarr i fuqishëm në orët e para të mëngjesit ka shuar jetën e një babai dhe vajzës së tij 9-vjeçare.
Flakët shpërthyen rreth orës 06:00 të mëngjesit të së dielës, duke përfshirë shtëpinë familjare dhe duke shkaktuar panik në lagje. Të parët që mbërritën në vendngjarje ishin shërbimet e urgjencës, të cilat nxituan të shpëtonin anëtarët e familjes.
Dy vajza të vogla, 9 dhe 11 vjeç, u nxorën nga shtëpia dhe u transportuan menjëherë në spital. Fatkeqësisht, vajza më e vogël nuk mundi t’u mbijetonte plagëve të rënda dhe ndërroi jetë pak orë më vonë. Ndërkohë, motra e saj 11-vjeçare ndodhet në gjendje kritike dhe po lufton për jetën në spital.
Edhe babai i tyre mori ndihmën e parë nga mjekët në vendngjarje, por pavarësisht përpjekjeve të ekipit mjekësor, ai nuk mundi të shpëtonte.
Policia e West Yorkshire ka bërë të ditur se nuk ka asnjë provë që të sugjerojë rrethana të dyshimta lidhur me shkaktimin e zjarrit. Hetimet janë ende në vazhdim në bashkëpunim me zjarrfikësit, për të kuptuar shkakun e saktë të kësaj tragjedie.
