Të paktën 168 persona humbën jetën dhe 745 të tjerë u plagosën, pasi cunami goditi një nga plazhet e Indonezisë dhe u pasua edhe me shpërthimin e një vullkani, mbrëmjen e së shtunës.
Sakaq, 30 persona vijojnë të jenë të humbur, pasi dallga prej 4.5 metra, ktheu përmbys një ndër koncertet që po mbahej në qiell të hapur në plazhin “Sunda Strait”, duke shkatërruar 430 shtëpi, 9 hotele dhe 10 anije.
Pamjet e publikuara në rrjetet sociale tregojnë një “mur” gjigant uji që u ngrit papritur mbi një koncertin e grupit të muzikës pop “Seventeen”, e pasi “spastroi” pjesëtarët e bandës nga skena, nisi të përmbyste edhe audiencën. Në një njoftim përmes Instagramit, lideri i grupit tha se dy pjesëtarë të tij kishin humbur jetën.
Autoritetet thonë se cunami mund të jetë shkaktuar nga një rritje jonormale e baticës, për shkak të hënës së re dhe rrëshqitjeje nënujore, pas shpërthimit të vullkanit “Anak Krakatoa”, i cili krijon kështu edhe një ishull të vogël në ngushticën “Sunda” mes Javës dhe Sumatrës. Agjencia e Meteorologjisë dhe Gjeofizikës gjithashtu tha se valët e baticës mund të jenë forcuar nga hëna e plotë.
Indonezia është një prej zonave më të prekura nga fatkeqësitë natyrore, pasi shtrihet në të ashtuquajturën “unazë e zjarrtë” e Paqësorit, ku pllakat tektonike përplasen me njëra-tjetrën, duke e bërë këtë zonë të prekshme nga vullkanet dhe tërmetet më të fuqishme të botës.
