Zjarri i rënë një ditë më parë në një pallat pranë Farmacisë 10 në Tiranë ka çuar në arrestimin e katër personave nga Policia, ndërsa hetimet vijojnë për zbardhjen e plotë të ngjarjes.
Mes të ndaluarve është edhe menaxheri i një marketi që ndodhej në katin e parë të godinës, ambient nga ku dyshohet se ka nisur flaka, e cila më pas është përhapur me shpejtësi duke përfshirë fasadën e pallatit. Në pranga kanë rënë gjithashtu administratori i pallatit dhe dy persona të tjerë, roli i të cilëve në këtë ngjarje po verifikohet nga autoritetet.
Sipas të dhënave paraprake, zjarri ka shkaktuar dëme të konsiderueshme në rreth 71 apartamente. Ende po punohet për të përcaktuar saktësisht se sa prej tyre janë shkatërruar plotësisht dhe sa kanë pësuar dëmtime të pjesshme.
Ndërkohë, burime nga hetimi bëjnë me dije se administratori i kompanisë ndërtuese, Armand Lilo, është shpallur në kërkim dhe nuk është lokalizuar ende.
Nga ana tjetër, kompania ndërtuese “Arlis Ndërtim” ka reaguar publikisht, duke deklaruar se objekti është ndërtuar në përputhje me të gjitha standardet dhe lejet përkatëse. Megjithatë, pavarësisht qëndrimit për mungesë përgjegjësie ligjore, kompania ka marrë përsipër rindërtimin e plotë të fasadës dhe rikonstruksionin e apartamenteve të dëmtuara, duke premtuar kthimin e tyre në gjendjen fillestare për banorët e prekur.
