Shqiptarëve foli për ç’të duash dhe s’do të reagojnë. Foli për rritjen katrastofike të çmimeve, rritjen e çmimit të naftës që nuk përkon aspak me shifrat në bursë. Thuaji që duhet të ngrihen në protestë sepse s’mban më ujë pilafi. Thuaji që qeveria na vjedh hapur, që çmimet e produkteve të shportës janë në stratosferë, që energjia do të shtrenjtohet, që studentëve s’do t’u jepet diploma tre vitet e para pasi e marrin, që të qëndrojnë në Shqipëri…
Thuaji ç’të duash dhe s’do t’i bëjë përshtypje. Por… t’i përmendësh Borën dhe Donaldin? Aty i ke prekur telat e zemrës!
Menjëherë vërsulen të komentojnë, të japin opinionin e tyre, të shajnë apo të mbrojnë dy personazhet që e bëjnë kaq mirë lojën e tyre në ekran!
S’dimë pse “u marrosën” të gjithë pas historisë së tyre që mori vëmendje të madhe që në fillim të edicionin të parë të “BBV” dhe s’dimë çfarë i intereson ende aq shumë, pasi u “shanë”, u “pështynë’, u tradhtuan dhe u lëpinë sërish aty ku kishin pështyrë.
Shumica e shqiptarëve janë ndarë në tre fronte: Fronti Bora, Fronti Donald dhe Fronti Beatrix.
Po Froni “Halle koke” që na shkakton kjo qeveri e dështuar? Po Fronti “S’na del paga ta mbyllim muajin deri në fund”?
Bora dhe Donaldi me vëmendjen e madhe që vazhdojnë të marrin, i nxorrën fitimet e tyre (i lumtë), por ne pse vazhdojmë të dalim të humburit? Kur do t’i thërrasim mendjes për problemet e vërteta që duhet të na shqetësojnë çdo ditë?
Telenovela “Bora & Donald” do të zgjasë për aq kohë sa njerëzit do të vazhdojnë ta shikojnë e komentojnë, pa e vrarë mendjen se po rrënohemi çdo ditë nga kjo qeverisje. Fundja, të na rrojnë Bora e Donaldi, po ne të tjerët s’kemi rëndësi!
/Iconstyle.al
