Piktori Arben Golemi është rikthyer në vendin e tij të lindjes, Beratin, me ekspozitën “I love my city”. Kjo ekspozitë vjen si një retrospektivë e punimeve në kohë të artistit dhe qëllimi kryesor i saj qëndron tek promovimi i qytetit shumë të dashur të piktorit. Në çdo tablo gjen diçka unike që karakterizon Beratin dhe thuajse në të gjitha fokusi kryesor qëndron tek arkitektura e qytetit.
Promovimi i Beratit, qëllimi kryesor i ekspozitës
Në një prononcim për “iconstyle.al”, piktori Golemi shprehet se qëllimi kryesor i ekspozitës së tij retroskpektivë, që përmbledh punime nga viti 2010 e deri më sot, qëndron tek promovimi i Beratit. Përveç kësaj piktori përpiqet që të japë dhe një mesazh tjetër mjaft të rëndësishëm për qytetin e tij të lindjes.
“Ideja e ekspozitës ka të bëjë me promovimin e turizmit në qytetin e Beratit. Berati është një pjesë e rëndësishme e laboratorit tim të krijimit. Unë kam lindur në Berat, jam edukuar aty, me arkiteturën e Beratit, kishat bizantine, pikturat murale. Ndërkohë unë kam studiuar për arkitekturë, pastaj jam marrë me pikturë.
Ne kemi marrë shumë nga qytetet tona dhe në këtë rast doja të theksoja që ne duhet edhe të japim, jo vetëm të marrim prej tyre. Duhet të punojmë me aq mundësi sa kemi, në këtë rast me promovimin e turizmit, që të vijnë sa më shumë turistë në Berat dhe të përmirësohemi nga ana ekonomike. Ndërkohë alarmi tjetër është që të mos e shkatërrojmë peizazhin e Beratit, por ta mbrojmë atë”, tha Arben Golemi.
Çfarë e frymëzon artistin nga Berati?
“Boshti i krijimtarisë sime në pikturë vjen nga arkitektura. Unë nuk vij nga Akademia e Arteve, kam studiuar për arkitekturë dhe në shumicën e pikturave të mia kanë rëndësi të madhe vizatimi dhe struktura. Domethënë unë i strukturoj mirë objektet, është një art që e kam nga formimi im akademik. Pikturat e mia kanë të bëjnë shumë me arkitekturën e vjetër, vlerat thelbësore të arkitekturës ndër vite”, shprehet Golemi për “iconstyle.al”.
Duke shtuar se Berati do të jetë gjithmonë pjesë e krijimtarisë së tij, piktori risjellë në vëmendje gjithë ekspozitat që ka hapur ndër vite për qytetin e Beratit. Ai thotë se në ekspozitat që ka hapur brenda dhe jashtë vendit (New York, Gjenevë, Stamboll, Athinë etj) thelbi ka qenë arkitektura unike e Beratit.
Thirrja e piktorit
Në fund piktori ju bën thirrje gjithë artistëve, që të fillojnë ta vënë artin në shërbim të njerëzve e qyteteve. Ai shprehet se ka ardhur koha për të kthyer diçka nga ajo që kemi marrë.
“Ka ardhur koha që të mos bëjmë vetëm art për art, por të vëmë artin tonë edhe në shërbim të njerëzve, në shërbim të qyteteve tona, në mënyrë që të promovojmë turizimin, vlerat e arkitekturës, vlerat e historisë. Mos të jemi kaq individualistë, pavarësisht se artisti në vetvete është një vetmitar. Mendoj se jemi në kohë për të bërë diçka, ose për të kthyer diçka nga ajo që ne kemi marrë”, shprehet Arben Golemi.
Ekspozita “I love my city” do të qëndrojë e hapur në galerinë “Edward Lear” në Berat deri në datë 21 nëntor.
