Prej javësh kemi shijuar ditët e ngrohta me diell dhe tetori e nëntori kanë qenë dy muaj me temperatura relativisht më të larta nga normalja. Mirëpo dielli duhet t’i thoni mirupafshim dhe të bëheni gati për ditët me shi e reshje bore.
Adiola Bani nga Meteoalb theksoi për “AbcNews” se gjatë mesjavës do të ketë reshje shiu në pjesën më të madhe të vendit, ndërsa në zonat malore mbi 1500 metra do të ketë edhe reshje dëbore. Ajo shtoi se gjatë të premtes do të ketë dhe një ulje drastike të temperaturave, sepse ato minimale pritet të zbresin nën zero.
“Dita e sotme ka nisur me vranësira dhe do të vijojë gjatë gjithë ditës kështu. Vetëm orët e paditës do të ketë shira në skajin verior dhe jug-perëndim të territorit. Të martën dhe të mërkurën do të ketë prezencë të shtuar të reshjeve në territorin shqiptar.
Gjatë natës së ditës së mërkurë do të kemi reshje dëborë në zonat malore në lartësinë mbi 1 500 metra mbi nivelin e detit“, tha Bani.
