Një tragjedi e rëndë ka goditur jugun e Shteteve të Bashkuara, ku përmbytjet e menjëhershme në Teksas kanë marrë jetën e të paktën 59 personave, përfshirë 21 fëmijë, sipas të dhënave më të fundit të publikuara nga autoritetet amerikane. Shifrat mund të rriten, ndërsa rreth 30 fëmijë rezultojnë ende të zhdukur, shumë prej tyre pjesëmarrës në një kamp veror të krishterë në brigjet e lumit Guadalupe.
Fuqia shkatërruese e ujit ka rrëmbyer shtëpi të tëra, ndërsa niveli i lumit u ngrit me plot 8 metra brenda vetëm një ore. Banorët e zonës kanë reaguar me zemërim, duke thënë se paralajmërimi për evakuim mbërriti shumë vonë, kur përmbytja kishte nisur tashmë të përpinte gjithçka. Pamjet nga terreni tregojnë qytetarë që vrapojnë në panik, për t’i shpëtuar ujit që mbulon gjithçka përpara.
Përmbytjet u shkaktuan nga shira të rrëmbyeshëm, që goditën rajonin më 4 korrik, Ditën e Pavarësisë së SHBA-së, duke e kthyer një festë në një makth për komunitetin.
