Tensione dhe protestë në selinë e PD-së, Stresi kapet nga policia Reperi Stresi e ka bërë të qartë tashmë bindjen e tij politike dhe respektin absolut për ish-kryeministrin Sali Berisha.
Sot në selinë e partisë kryesore opozitare ka pasur tensione e përplasje të shumta, ku ka ndërhyrë dhe policia me gaz lotsjellës.
Deri tani raportohen 12 persona të shoqëruar e një ndër ta është edhe reperi i njohur Arkimed Lushaj, apo Stresi.
Kësaj here Stresi ka postuar një InstaStory ku pretendon se nuk ka bërë asgjë.
“Nëse kam gjujt një gurë keni të drejtë me vepru po jo kot. Unë duhet të shoqërohem gjithmonë pa bërë gjë! I bëj thirrje mediave”,- ka shkruar reperi.
Protesta ka nisur pikërisht në orën 12:00 në momentin kur dera kryesore e selisë është hapur me forcë nga protestuesit.
Zyrtarët policorë kanë filluar që të hedhin gaz lotsjellës dhe ujë drejt protestuesve, në përpjekje për t’i shpërndarë ata.
Ndërkohë pas këtij veprimi ish-lideri i PD-së, Sali Berisha ka folur para mediave duke kërkuar qetësi nga të gjithë mbështetësit e tij që janë mbledhur për të protestuar përpara selisë së partisë demokratike.
Ka pasur edhe hedhje gazi lotjsellës në selinë e PD-së nga mbështetësit e Bashës, ndërsa disa protestues po tentojnë që të arrijnë në katin e dytë të ndërtesës.
