Plot 10 ditë pas bërjes publike të dy rasteve të para të prekura me koronavirus në Shqipëri, Ministria e Shëndetësisë ka vendosur më në fund të marrë masa për përballimin e emergjencës në sistemin shëndetësor.
Ditën e sotme, Ministria e Shëndetësisë ka hapur një tender 24-orësh për blerjen e respiratorëve, pajisjet që mundësojnë frymëmarrjen për pacientët me komplikacione të rënda, duke konfirmuar kështu atë që dyshohej prej kohësh, që vendi ynë nuk ka mjaftueshëm pajisje për të përballuar një epidemi të tillë.
Sipas dokumentave të siguruara nga “Dosja.al”, fondi limit për blerjen e respiratorëve është 129, 727.371 lekë dhe vijon të mos bëhet transparencë mbi numrin e këtyre pajisjeve që mund të vulosin fatin e pacientëve të shumtë.
Pas disa hulumtimeve të kryera online nga “iconstyle.al”, kostoja e një respiratori varion nga 25.000 në 50.000 dollarë, me një çmim mesatar prej 37.500 dollarësh.
Me një përllogaritje të thjeshtë na rezulton se me shumën e përcaktuar, Ministria e Shëndetësisë mund të marrë nëpërmjet këtij tenderi përfarërsisht 30 respiratorë, një shifër tërësisht qesharake kjo duke marrë parasysh faktin që në vendin tonë përflitet se ka një total prej 140 respiratorësh, përfshirë këtu dhe ata të spitaleve private.
Për të lexuar më saktë këto shifra, mjafton të përmendim se sistemi shëndetësor italian kishte në gjendje 3000 të tillë dhe hapi një tender për 5000 respiratorë të tjerë për të përballuar fluksin e pacientëve me probleme të theksuara të frymëmarrjes.
Lidhur me këtë çështje, iconstyle.al ka kontaktuar Ministrinë e Shëndetësisë për një informacion më të detajuar dhe jemi ende në pritje të një përgjigjeje.
