Ka shkuar në 73 numri i mjekëve që kanë ndërruar jetë si pasojë e COVID-19 në Itali, pasi së fundmi dy mjekë të tjerë kanë ndërruar jetë dhe sipas raportimeve të mediave vendase, dy mjekët ishin njëri kardiolog, ndërsa tjetri mjek i përgjithshëm.
Lajmin e ka bërë të ditur Federata Kombëtare e Urdhrit të Kirurgëve dhe Stomatologëve italianë, që shpjegon se krahas viktimave që po shkakton çdo ditë, virusi po merr edhe shumë jetë mjekësh të cilët janë në vijën e parë të luftës kundër tij.
Në total numri i punonjësve shëndetësorë të infektuar deri tani ka tejkaluar shifrën e 10,000 rasteve, nga të cilët rreth 20% janë mjekë.
Kujtojmë se në Itali, në Bergamo, ndodhen edhe 10 mjekë e 20 infermierë shqiptarë, që kanë shkuar në ndihmë të kolegëve në këtë situatë të jashtëzakonshme.
Italia mbetet vendi më i prekur nga koronavirusi në Europë me 115, 242 të infektuar dhe 13,915 viktima, teksa sa i përket numrit të viktimave, shteti fqinj renditet në vendin e parë në rang botëror.
Ndërsa, SHBA ka numrin më të lartë të personave të prekur nga koronavirusi dhe deri tani janë rreth 245,442 të infektuar. /gazetareforma
