Komuniteti LGBTI+ së bashku me figura të njohura të vendit, artistë e ambasadorë, janë bërë bashkë për të përcjellë një mesazh të fuqishëm për të drejtat e tyre. Ata kanë realizuar një këngë me titull “Locked Inside” (I mbyllur përbrenda), që simbolizon karantinën shpirtërore të personave të komunitetit, për shkak të frikës për të mos shprehur hapur ndjenjat e tyre.
Në videoklip shihet se janë përfshirë ambasadorët Yuri Kim, Luigi Soreca, Peter Zingraf, për t’i ardhur në mbështetje komunitetit LGBTI+. Gjithashtu në të shfaqen artistet Marsela Çibukaj, Kamela Islamaj, Anxhela Llaha, që interpretojnë këngën. Aktivistja e komunitetit, Xheni Karaj, ka qenë e para që ka shpërndarë videon dhe është shprehur se gjatë karantinës kuptuan se ky nuk ishte realitet i ri për personat LGBTI+.
“Në muajt mars dhe prill, aktivistë dhe pjesëtarë të komunitetit, po diskutonin për temën qendrore të Paradës së Krenarisë 2020, në një kohë kur e gjithe bota po kalonte momentet e një pandemie dhe karantine të vështirë. Ajo çfarë u kuptua, ishte se karantina nuk ishte një realitet i ri për shumicën e personave LGBTI+. “Karantinën” e përjetojnë nëpërmjet izolimit shpirtëror, pamundësisë për të qenë vetja si dhe frikës për të dashuruar haptazi. Është “karantina shpirtërore” esenca e këngës së këtij viti të Qendrës Streha; por njëkohësisht edhe kurajoja dhe fuqia për të dashur, të cilat e thyejnë këtë “karantinë”. Përmes këngës, duam t’i bëjmë bashkë sërish të gjitha këto ndjesi dhe emocione të vitit të vështirë 2020, me shpresën se mund të bashkohemi dhe më tej rreth vlerave të diversitetit, pranimit dhe dashurisë”, ka shkruar Xheni.
Komuniteti LGBTI+ kërkon ndryshime në Kodin e Familjes
Ndërkohë pak ditë më parë ambasada Pink i dërgoi një letër ministres së Drejtësisë, Etilda Gjonaj, për t’i kërkuar që edhe ata të gëzojnë të drejtën e birësimit të fëmijëve dhe të barazisë në martesë. Letra e dërguar nga Ambasada Pink u bë pas iniciativës së propozimit të Ministrisë së Drejtësisë, e cila ka paraqitur për konsultim publik disa ndryshime dhe përmirësime të ligjit për birësimet dhe për Kodin e Familjes. Sipas Ambasadës Pink, përveç kërkesave të përhershme nga komuniteti LGBTI+ dhe organizatave të tjera të cilat angazhohen në fushën e të drejtave të njeriut, qeveritë shqiptare kanë patur edhe presionin ndërkombëtar në lidhje me bërjen e ndryshimeve në ligjin për birësimet dhe në Kodin e Familjes.
Kujtojmë se edhe pse gjatë viteve të fundit ka pasur disa përpjekje për ndryshime të Kodit të Familjes, nga organizata të ndryshme, për lejimin e të drejtës së birësimit të fëmijëve nga pjesëtarë të komunitetit LGBTI+, vendi ynë vazhdon ende që të diskriminojë haptazi anëtarët e këtij komuniteti. Kësisoj duke treguar qartazi edhe mos emancipimin dhe mentalitetin ende të ndrydhur si shoqëri.
