Situata që Shqipëria po kalon aktualisht me përhapjen e frikshme të virusit Covid-19 është ekzaktësisht një skenar i paralajmëruar. Mbajtja hapur e kufijve me Italinë për më shumë se dy javë pas viktimave të para në vendin fqinj, pashmangshmërisht do të na sillte në situatën që jemi sot, ku numri i të prekurve shtohet nga ora në orë dhe deri më tani është shënuar një viktimë.
Por teksa popullit i bëhet thirrje për të mos u përfshirë nga paniku, duket se dhe ata që mbajnë titullin e ekspertit, nuk dinë as vetë ç’thonë. I tillë është rasti i mjekut Tritan Kalo, i cili mbrëmjen e kaluar në emisionin “Provokacja”, bëri parashikimin çoroditës që Covid-19 do shuhet në muajin prill për shkak të rritjes së temperaturave.
“Temperaturat e ajrit fillojnë dhe rriten. Temperaturat e larta nuk e favoriozjnë dhe ulin ritmin e virusit. Çdo infeksion viral ashtu si edhe gripi kanë një kurbë të evolucionit.
Gripi fillon në 15 nëntor dhe kulmon në shkurt. Ne shohim që gripi ka rënë. E njëjta gjë po ndodh edhe me Covid në Kinë.
Kurbat e zakonshme kanë një evolucion të tillë që ne i themi me zhvendosje pak djathtas. Nuk janë një evolucion të tillë, në mënyre që rritja është graduale.
Në fillim të prillit fillon dhe shuhet. Virusi ka një evolucion që në harkun kohor shtrihen 2-3 muaj.”- u shpreh mjeku Kalo, në deklaratën e tij që ka shkaktuar jo pak irritim tek personat që përgjatë kësaj kohe, kanë ndjekur me imtësi zbulimet e reja lidhur me sëmundjen misterioze që ka goditur mbarë botën.
Deklarata e Kalos, pason atë të presidentit amerikan Donald Trump, i cili gjithashtu pohoi në papërgjegjshmëri të plotë se temperaturat e ngrohta do ta vrasin virusin. Por a mund ta besojmë diçka të tillë?
Ndonëse mund të ekzistojë një ngjashmëri mes koronavirusit dhe gripit të zakonshmëm, për shkak të mënyrës së përhapjes, sipas ekspertëve NUK KA ASNJË TË DHËNË QË DËSHMON SE KORONAVIRUS DO TË SHUHET ME RRITJEN E TEMPERATURAVE.
Në një shkrim të publikuar së fundmi nga “The Washington Post”, disa studime dhe ekspertë ndërkombëtarë pohojnë të njëjtën gjë: Koronavirusi mund të ketë një cikël sezonal, por kjo s’do të thotë se do të shuhet këtë verë (lexo këtu).
Ashtu sikurse theksojnë thuajse të gjithë ekspertët, Covid-19 ka qenë për një kohë shumë të shkurtër midis nesh për të dalë në përfundime ekzakte, ndaj është thelbësore që të bëhet kujdes me informacionet e dhëna në rrugë publike. Dhe teksa mjekë e shkencëtarë në mbarë botën rezervohen për të dhënë deklarata të tilla, në Shqipëri “ekspertët” tentojnë të minimizojnë rrezikun duke kryer dezinformime që mund të rezultojnë në një ulje të vigjilencës ndaj masave që duhen marrë për t’u mbrojtur nga kjo sëmundje kaq agresive
