Mosmarrëveshje dhe zënka ka thuajse në të gjitha familjet shqiptare dhe të famshmit nuk janë aspak imunë ndaj tyre. Ka mjaft personazhe të njohur që kanë folur hapur për marrëdhëniet me familjarët dhe sesi koncepte të tilla si “baba model” nuk ekzistojnë.
Rasti më i fundit është marrëdhënia mes Robert Berishës dhe Tunës. Për këngëtarin, familja është e shenjtë dhe e mbron mbi çdo gjë tjetër. Por edhe pse Tuna Sejdi është martuar më vëllain e tij dhe ka një djalë me Patrisin, ai sërish nuk e konsideron pjesë të familjes.
Megjithatë, Robert Berisha nuk është i vetmi që nuk flet me dikë nga familja. Ka një numër të madh artistësh shqiptarë të cilët nuk flasin me persona që kanë të njëjtin gjak dhe kjo për arsyet nga më të ndryshmet.
“Iconstyle.al” sjell sot të gjithë ata të famshëm shqiptarë që nuk flasim me familjarët dhe arsyet përkatëse, sipas tyre, për prishjen e raporteve.
Robert Berisha nuk flet me Tunën
Të gjithë mendonim se Tuna ishte problemi i Nora Istrefit, por jo. Në një intervistë të pak ditëve më parë, Robert Berisha sqaroi se është ai që nuk flet me Tunën dhe nuk pajtohet me asnjë nga gjërat që bën ajo. Në studion e emisionit “Rudina”, ai tha se nuk ka asnjë kontakt me partneren e të vëllait dhe nuk do që të ketë në të ardhmen. Me Patrisin, Roberti vazhdon të ketë raporte të mira dhe këto mosmarrëveshje nuk kanë ndikuar në lidhjen e tyre vëllazërore.
“Nuk ka shans të më prishin mua prej Patrisin, e as nuk ka për të ndodhur. Jemi shumë mirë, edhe ata shpresoj që të jenë mirë. Kjo do të thotë të mos përballesh me dikë, të mos të të shkojë muhabeti me dikë, të mos pajtohesh me jetën e dikujt. Sistemi i jetës së tyre nuk më konvenon dhe kam të drejtë unë si Robert të mos pajtohem edhe mos me jem i pranishëm aty ku është ai person.
Niko Komani nuk flet me të atin
Stilisti i famshëm shqiptar Niko Komani, nuk flet më të atin prej vitesh. Këtë gjë e ka zbuluar vetë stilisti në një intervistë në emisionin “Vizioni i Pasdites” në vitin 2016. Komani nuk ka dhënë arsye se përse ka ndodhur diçka e tillë, por ai tha se zënka të tilla mes tyre janë të përhershme, pasi ata janë shumë të ngjashëm.
“Më mungon shumë sepse momentalisht nuk flas me të. Ngjajmë shumë dhe ndoshta është personi i vetëm që nuk e toleroj. Ai është gjaku im dhe këtu mbaron gjithçka”, është shprehur Komani duke u përlotur.
Dafina Zeqiri nuk flet me të atin
Dafina Zeqiri dhe motra e saj Besa nuk flasin me babanë e tyre. Prej kohësh, për të mos thënë që kur ishin të vogla, motrat Zeqiri nuk ruajnë kontakte me babain dhe shkaktari i vetëm sipas tyre është vetë babai.
Ky i fundit i ka braktisur kur kanë qenë të vogla dhe ndonëse u ka kërkuar falje pas 21 vjetësh, ato ende nuk e kanë falur. Sipas Besës, babai ka qenë “shumë i preokupuar për të lënë shumë femra shtatzënë dhe për t’i lënë fëmijët jetimë”. Për motrat Zeqiri, babai thjesht nuk ekziston dhe është zëvendësuar nga nëna e tyre, të cilën e urojnë edhe për ditën e baballarëve.
Ornela Vorpsi nuk flet me motrën Laura
Ornela Vorpsi zbuloi pak kohë më parë një detaj të rëndësishëm në jetën e saj. Ajo nuk flet me motrën, ish-zëdhënësen e Partisë Demokratike, Laura Vorpsi. Ndërsa jetojnë në dy vende të ndryshme, Ornela në Paris dhe Laura në Tiranë, ato çuditërisht nuk kanë asnjë marrëdhënie me njëra-tjetrën. E pyetur në emisionin “Opinion” për këtë gjë ajo u shpreh:
“Kur nuk kam çfarë të shkëmbej me njerëzit, nuk më intereson. Nuk kam raport me motrën”.
Ajo sqaroi se ka vendosur që mos të kenë asnjë marrëdhënie bashkë.
Xhensila Myrtezaj me të atin
Edhe pse kishim një shpresë për ta njohur në dasmën e saj, babai i këngëtares shqiptare Xhensila Myrtezaj nuk u duk gjëkundi. As vetë Xhensila nuk ka folur ndonjëherë për babain e saj, dhe kjo na bën të dyshojmë se nuk ka raporte të mira me të.
Bukuroshja shqiptare bën shpesh publikime me nënën dhe motrën por vetëm kaq. Nuk e dimë nëse ka pasur ndonjë zënkë mes tyre ose jo, por figura atërore ka munguar gjithmonë në panoramën familjare të Xhensilës.
