Ditën e djeshme u njoftua se kompania amerikane Pfizer dhe ajo gjermane BioNTech, kanë finalizuar me sukses vaksinën e parë 90% efektive kundër Covid-19 dhe sipas analizave paraprake, kjo vaksinë mund t’i parandalojë mbi 90 për qind të njerëzve nga kontraktimi i virusit.
Por ajo që të gjithë duan të dinë është se si do të shpërndahet kjo vaksinë dhe cilat grupmosha janë më të favorizuara për ta marrë të parat.
Eric Toner, personi përgjegjës për shpërndarjen e vaksinave i Universitetit John Hopkins, thotë: “Nuk kemi nevojë për një vaksinë perfekte. Për të arritur imunitetin mjafton një vaksinë e mirë”.
Ndërkohë sipas Universitetit John Hopkins shpërndarja do të bëhet në bazë të disa grupeve që janë më të rrezikuara për t’u infektuar me virusin Covid-19. Ato listojnë dy nivelet bazë që duhet të kenë të parët këtë vaksinë:
Niveli 1: prioriteti absolut
Pjesëtarë të ekipeve që përballen të parët me pandeminë: stafi mjekësor, infermierë dhe mjekë
Grupet dhe individët e shërbimeve shoqërore thelbësore: transport publik, prodhim dhe shpërndarje ushqimesh dhe arsimtarët.
Personat më të rrezikuar, femrat shtatzënë dhe stafi i qendrave sociale.
Niveli 2: në varësi të disponueshmërisë së vaksinës
Farmacistët dhe mjekët që kurojnë persona që nuk janë me koronavirus
Personat që kanë vështirësi në aksesin e shërbimeve në rast se sëmuren: banorët e zonave të thella dhe të largëta, me infrastruktura shëndetësore të pazhvilluara.
Pjesëtarë të tjerë të shërbimeve shoqërore bazike: media komunikimi, policia, zjarrfikësit.
