Djemtë dhe vajzat e reja shqiptare influencohen nga showbiz-i për ndërhyrjet estetike që duan të realizojnë!
Në një intervistë ekskluzive për “iconstyle.al”, doktoresha Lida Hoxha nga klinika “Dermolife” ka zbuluar trendet e kirurgjisë dhe atë se çfarë kërkojnë shqiptarët kur trokasin në dyert e klinikës së saj.
Të influencuar nga personazhe të njohur të showbiz-it, mjaft djem dhe vajza kërkojnë ndërhyrje të cilat janë në kundërshtim me moshën e tyre, me fizionominë, dhe ka raste kur atyre u thuhet “jo”.
Trendi i mollëzave të ngritura dhe buzëve mishtore si motrat Kardashian vijon të jetë një ndër të preferuarit edhe në vendin tonë, por sot për sot, një ndër ndërhyrjet më të kërkuara mbetet ajo e hundës, e quajtur ndryshe Rinoplastika.
Doktoresha nuk hezitoi të tregojë për “iconstyle.al” edhe emrat e disa prej personazheve të njohur që kanë realizuar ndërhyrje të ndryshme në klinikën e saj ndër të cilët mund përmendim: Roza Lati, Xhesika Polo, Julian Deda, Gentian Zenelaj, Xum Allushi, Fifi, Dona, Artan Hoxha, Aldon Lipe etj.
Intervista e plotë me doktoreshën Lida Hoxha:
1- Cilat janë trendet e kirurgjisë sot? Çfarë kërkojnë shqiptarët?
Në ditët e sotme ka ndryshuar konceptimi për ndërhyrjet estetike, ndryshe nga disa vite më parë kur në trend ishte vetëm operacioni i hundës, sot janë të prekshme dhe shumë të praktikuara të gjitha llojet e kirurgjisë së fytyrës dhe rikonstruktive.
2- A është akoma në modë trendi Kardashian, me mollëzat e ngritura, buzë të trasha?
Në fakt po, akoma vazhdon të jenë në trend buzet mishtore, si dhe mollëzat e formësuara dhe të ngritura, çdo ditë paraqiten vajza të reja që kanë si kërkesë dy cilësitë që keni përmendur edhe ju.
3- Hundën e kujt preferojnë vajzat shqiptare? A vijnë te ju me emra VIP-ash?
Rinoplastika, ose ndërhyrja në hundë mbetet ndër ndërhyrjet më të kërkuara edhe të realizuara. Në vitet e kaluara edhe vetë kirurgët nuk kishin këtë diversitet mjetesh, për të realizuar ndërhyrje perfekte dhe për këtë motiv ata mundoheshin të ndiqnin të njëjtën metodë te të gjithë pacientët. Ndërkohë që sot trajtohet ose duhet të trajtohet çdo pacient si një rast i veçantë dhe unik, trajtimi duhet të jetë i bazuar në specifikat përkatese që ka secila hundë. Në fund të fundit sfida më e madhe që ka kirurgjia estetike sot është të krijojë një rezultat natyral në fund. Jo vetëm për hundën por shumë personazhe publike kanë zgjedhur klinikën tonë për të realizuar ndërhyrje të ndryshme ku mund të përmendim: Roza Lati, Xhesika Polo, Julian Deda, Gentian Zenelaj, Xum Allushi, Fifi, Dona, Artan Hoxha, Aldon Lipe etj. Sigurisht që disa prej pacientëve tanë vijnë edhe me raste referuara kryesisht të rasteve të personazheve publike të cilët i kemi trajtuar në klinikën tonë.
4- Cila është ndërhyrja estetike më e kërkuar nga meshkujt shqiptarë?
Ndërhyrja që dominon gjininë mashkullore është lipoaspiracioni (thithja e dhjamit) kryesisht në zonën e abdomenit.
5- Kur e këshilloni një ndërhyrje plastike në fytyrë tek femrat, cila është mosha e duhur?
Nëse i referohemi plastikës së fytyrës, ose lifting kirurgjikal është një ndërhyrje që e rekomandojmë për zonjat mbi 45 vjeç.
6- Shumë njerëz nuk dine ende ta bëjnë dallimin midis botox edhe filler, a mund të na e bëni më të qartë kur përdoret njëra dhe kur përdoret tjetra?
Dallimi parësor midis të dyve është se botox zvogëlon aktivitetin e muskujve në fytyrë që shkaktojnë rrudha, ndërsa fillerat ose acidi hialuronik mbushin zonat problematike me kolagjen, i cili ndihmon në stimulimin e rritjes se kolagjenit në fytyrë, si dhe mbushjen e hapësirave që krijohen në zona të ndryshme të fytyrëa dhe të qafës, gjithashtu për të shtuar volumin e buzëve apo mollëzave.
7- Në cilat raste nuk e këshilloni një ndërhyrje estetike? Keni pasur ndonjë rast kur keni thënë “jo” nuk bëhet?
Kjo është një pyetje që më bëhet vazhdimisht dhe po, ka shume raste kur kemi kthyer kryesisht vajza dhe djem të rinj të cilët e kanë më të lehtë të influencohen nga shembujt e shoëbiz dhe kërkojnë ndërhyrje të cilat jane në kundërshtim me moshën e tyre, me fizionominë nëse i referohemi një operacioni në hundë, ose kur rezultati pritet të jetë në disproporcion me format e tyre fizike, por më kryesorja në rastet kur pacientit mund t’i rrezikohet shëndeti thuhet kategorikisht jo. Ndoshta në fillim mund të mërziten por më vonë do ta kuptojnë dhe do të na falenderojnë.
