Pas vendimit për kryerjen e testimeve serologjike në laboratorë privatë, në funksion të rritjes së kapaciteteve për përballimin e situatës me pandeminë, Komiteti Teknik i Ekspertëve ka miratuar një tjetër vendim të pakuptimtë.
Pasditen e sotme, Ministria e Shëndetësisë informoi me anë të disa rreshtave se tamponi për Covid-19 do të kryehet edhe në laboratorët privatë për të gjithë ata persona që do të lëvizin jashtë vendit dhe analiza është kusht për vendin që ata duan të udhëtojnë.
Paraprakisht, risjellim në vëmendje se ligji shqiptar për luftimin e epidemive sanksionon që trajtimi i të sëmurëve të bëhet falas. Legjislacioni shqiptar shprehet qartë se diagnoza dhe kura për të sëmurët nga një sëmundje epidemike duhet të ofrohet pa diskriminim dhe falas, pavarësisht nëse institucioni që e ofron është publik apo privat.
Në njoftim thuhet se do të jetë Ministria e Shëndetësisë që do të certifikojë laboratorët privatë ku do kryhet tamponi dhe nëse do të ketë raste pozitive, atëherë ato do referohen direkt tek Instituti i Shëndetit Publik.
Nga ky njoftim ngrihen shumë pikëpyetje. Së pari, a do kryhen me pagesë këto testime dhe nëse po sa? Së dyti, kush do i monitorojë abuzimet që mund të bëhen në këto struktura private? Kur flasim për abuzime kemi parasysh faktin se shumëkush mund të përfitojë nga miqësia e shumëkush mund të korruptohet për të falsifikuar rezultatin në mënyrë që të lëviz jashtë shtetit.
Në këto kushte, “iconstyle.al” iu drejtua disa prej instancave dhe personave përgjegjës për këtë çështje dhe sikundër ndodh prej fillimit të epidemisë me mungesën e transparencës, nuk morëm asnjë përgjigje.
E vetmja që na kushtoi disa sekonda është zëdhënësja e ministres së Shëndetësisë Etiola Kola, e cila tha as më pak e as më shumë ato që ishin shkruar në njoftimin për shtyp. Teksa insistuam të dimë më shumë rreth çmimit të tamponeve, Kola tha se Ministria e Shëndetësisë miraton procedurat dhe nuk ka lidhje me çmimin.
Ndërkohë nga Instituti i Shëndetit Publik, kontaktuar në rrugë zyrtare nuk kemi ende një përgjigje. Po ashtu, edhe Eugena Tomini, shefja e Survejancës dhe Shërbimit të Inteligjencës Epidemike në ISHP dhe Silva Bino shefe e Epidemologjisë kanë zgjedhur të heshtin dhe të mos përgjigjen. Ah, madje Bino na e ka lënë ‘seen’.
Në këto kushte iu drejtuam disa prej spitaleve private, por na thanë se ende nuk iu është komunikuar vendimi dhe nuk kanë informacione.
Kështu, mbetemi ende në tym, teksa Ministria e Shëndetësisë vijon të informojë në mënyrë të tërthortë dhe personat përgjegjës vijojnë të mos e kuptojnë se informimi i publikut është DETYRË jo dëshirë.
