Talebanët kanë vendosur të tjera kufizime për gratë afgane. Të gjitha ato që duan të udhëtojnë në distanca të gjata me rrugë nuk duhet të lejohen në transport, përveç nëse shoqërohen nga një i afërm mashkull.
Direktiva u njoftua nga Ministria për Promovimin e Virtytit dhe Parandalimin e Veseve dhe është goditja më e fundit ndaj të drejtave të grave që kur islamistët radikalë morën pushtetin në gusht.
Zëdhënësi i Ministrisë Sadeq Akif Muhajir tha:
“Gratë që udhëtojnë për më shumë se 72 kilometra nuk duhet t’u ofrohet një udhëtim nëse nuk shoqërohen nga një anëtar i ngushtë i familjes”.
Mujahir shtoi se grave gjithashtu do t’u refuzohet transporti rrugor nëse nuk mbajnë hixhab.
Direktiva gjithashtu u kërkoi njerëzve që të ndalonin së luajturi muzikë në makinat e tyre gjatë udhëtimit.
Kufizimet janë kritikuar nga aktivistët e të drejtave të njeriut, të cilët thonë se i bëjnë “të burgosura” gratë.
“Ky rend i ri në thelb shkon … më tej në drejtimin e bërjes së grave të burgosura,” tha për AFP Heather Barr, drejtore e asociuar e të drejtave të grave në Human Rights Watch.
“Kjo gjë i mbyll mundësitë që ato të jenë në gjendje të lëvizin lirshëm, të udhëtojnë në një qytet tjetër, të bëjnë biznes, ose të jenë në gjendje të ikin nëse përballen me dhunë në shtëpi” shtoi ajo.
