Që nga konfirmimi i rasteve të para me COVID-19 në vendin tonë, shërbimi taxi u pezullua, ndërsa kryeministri Edi Rama bëri me dije se taksistët do të marrin pagë lufte.
Me vendim qeverie, taksitë filluan aktivitetin një javë më parë ndërsa duhet të zbatonin një protokoll masash sigurie si për shembull; shërbimi duhet të ofrohej vetëm brenda qytetit, orari i lëvizjes deri në 17:30, respektimi i higjienës, apo marrja e vetëm një personi në mjet.
Ndërkohë që nga dita e sotme, taksitë mund të ofrojnë edhe shërbimin ndërqytetas, ku mund të transportojnë deri në dy persona nga e njëjta familje.
Ashtu si të gjithë aktivitetet ekonomike, edhe taksitë u goditën rëndë ekomomikisht për shkak të COVID-19.
E megjithatë, rifillimi i aktivitetit, nën masat tolerante të qeverisë, nuk po i jep mundësinë që të rimëkëmben.
Gazetareforma.com ka kontaktuar me administratorin e “Do Taxi Tirana”, Indrit Ujka, i cili ka treguar veshtirësitë që po has ky aktivitet, për shkak të masave kufizuese të qeverisë.
Ujka shprehet, se njerëzit janë të stepur për të përdorur taksi, edhe pse masat mbrojtëse zbatohen në mënyrë të përpiktë, pasi kanë frikë se u mbaron afati i lëvizjes.
Njëkohësisht sipas tij, policia nuk është treguar aspak tolerantë me shoferët e taksive, të cilët janë ndaluar disa herë dhe u është kërkuar autorizimi për të lëvizur, pavarësisht se kryeministri dha dritën jeshilë për rifillimin e këtij aktiviteti.
“Njerëzit janë tërësisht të stepur për të përdorur taksi edhe pse masat mbrojtëse zbatohen në mënyrë të përpiktë, pasi kanë frikë se u mbaron afati i lëvizjes. Edhe punonjësit e taksive nuk janë toleruar, policia i ndalon vazhdimisht edhe pse kanë autorizimet për të lëvizur”- shprehet Ujka.
Gjithashtu, kufizimi i lëvizjes së taksive deri në 17:30, njësoj si makinat private është konsideruar i pakuptimtë nga Ujka.
“Kufizimi i lëvizjes deri në orën 17.30 veçanërisht për taksitë është absurd. Virusi nuk e ka punën me orar, që të përhapet pas orës 17.30 dhe prandaj duhet të ndalojmë çdo aktivitet. Aq më tepër që në gjithë botën masat janë liruar. Tani që rreziku është më i ulët këto kufizime nuk kanë kuptim”,- vijon Ujka.
Shqetësimi i ngritur ka një bazë të fortë logjike, duke qenë se një pjesë e bizneseve nuk kanë mundësi të sigurojnë transportin e punonjësve.
Shumë restorante, të cilët ofrojnë shërbimin “delivery”, punojnë edhe pas orës 17:30, disa prej tyre edhe 24 orë, por jo të gjithë kanë mundësi të sigurojnë transportin e punonjësve, duke krijuar kështu një ngërç në funksionimin e këtij sektori.
Duke qenë se transporti publik prej dy muajsh është pezulluar, taksitë do të ishin një alternativë e mirë për transportin.
Vështirësi në transport kanë hasur gjithashtu edhe qytetarët me probleme shëndetësore.
Ministria e Shëndetësisë ka bërë me dije, se gjatë periudhës së epidemisë, shërbimi i ambulancës do të ofrohet vetëm për rastet emergjente.
Mirëpo shumë qytetarë për arsye nga më të ndryshmet, apo për të ndjekur një kurë apo terapi, u është dashur t’i drejtohen dyerve të spitalit, duke gjetur mënyra alternative transporti.
Nga sa u tha më sipër, pavarësisht dhënies së dritës jeshile për të riflluar aktivitetin, masat kufizuese, do t’ja vështirësojnë shumë punën taksive në rrugën drejt rimëkëmbjes. /gazetareforma
