Një prej tajfuneve më të fuqishëm të vitit, Ragasa, ka shkaktuar kaos në Kinën jugore, pasi përmbytje vdekjeprurëse dhe rrëshqitje dheu goditën më herët Tajvanin dhe Filipinet. Mbi 1.89 milionë njerëz janë evakuuar nga provinca Guangdong, ku ndodhen qytete të mëdha si Shenzhen dhe Guangzhou.
Në Tajvan, të paktën 14 persona kanë humbur jetën dhe 129 të tjerë rezultojnë të zhdukur, pasi një digë natyrore e formuar pas rrëshqitjeve të korrikut u shemb, duke përmbytur komunën Guangfu me 68 milionë tonë ujë. Pamjet dramatike tregojnë rrugë të përmbytura, makina të marra nga uji dhe banorë të izoluar në katet e sipërme të shtëpive.
Ragasa goditi Hong Kongun të mërkurën në mëngjes me erëra deri në 168 km/h, duke dëmtuar infrastrukturën dhe përmbytur zona të ulëta. Makao, qyteti më i populluar për metër katror në botë, raportoi përmbytje që arritën deri në bel.
Autoritetet kanë vendosur alarmin maksimal në disa rajone, me mbi 38,000 zjarrfikës të mobilizuar dhe mbi 10,000 anije të zhvendosura në zona të sigurta. Megjithëse qytetet si Hong Kongu kanë investuar në sisteme moderne kullimi, intensiteti i stuhive, i nxitur nga kriza klimatike, po i vë ato në prova të vështira. Tajfuni Ragasa është i 9-ti për këtë vit në Hong Kong, mbi mesataren vjetore.
