Moderatorja dhe influencerja Fjoralba Ponari ka reaguar ashpër në rrjetet sociale ndaj akuzave për abuzime me tenderat që lidhen me ish-zëvendëskryeministren Belinda Balluku, si dhe ndaj paketës së re fiskale të propozuar nga qeveria e Edi Ramës.
Në një videomesazh, Ponari iu referua deklaratës së gazetares Klodiana Lala, ku përmendet shifra deri në 1 miliard euro në lidhje me abuzimet e dyshuara me tenderat. Për të treguar përmasat e kësaj shume, ajo bëri një përllogaritje se sa vite do t’i duheshin një personi për ta shpenzuar.
“Dje po shihja deklaratën e Lalës për ish-numrin dy të qeverisë, që akuzohet për abuzime me tendera, deri në vlerën e 1 miliard eurove. Një miliard euro. Njëshi me nëntë zero mbrapa. E di sa i duhet një njeriu që të shpenzojë 1 miliard euro? I duhen 55 vite jetë, ku çdo ditë të shpenzojë 50 mijë euro. Pa bërë asgjë, pa shtuar as edhe një cent në pasurinë e saj. 55 vite, ku ditën duhet ta ketë kuotën e shpenzimeve 50 mijë euro. Ejj…”, shprehet Ponari.
Moderatorja e lidhi reagimin e saj edhe me propozimet e qeverisë për Paketën Fiskale 2027, duke kritikuar vendosjen e taksave të tjera në një kohë kur në debatin publik janë ngritur akuza për abuzime me fondet publike.
“Me pafytyrësinë më të madhe, propozojnë taksa të tjera!”, shprehet Ponari në rrjetet sociale.
Paketa e re fiskale përfshin edhe propozime që lidhen me taksimin e të ardhurave të influencerave, kategori së cilës i përket edhe vetë Ponari.
Propozimet kanë shkaktuar reagime në rrjetet sociale, ndërsa kritikat ndaj tyre zhvillohen në një klimë tensionesh politike dhe protestash kundër qeverisë.
