Erand Sojli është rikthyer në “shtëpi”! Aktori i njohur i humorit ka vendosur të bëhet sërish pjesë e kastit të aktorëve në spektaklin “Portokalli”. Lajmin e ka bërë të ditur vetë aktori në një intervistë për televizionin “Top Channel”, ku bën të ditur se braktisi Amerikën për të ndjerë edhe njëherë dashurinë e publikut.
“Unë jetoj në Amerikë dhe vij për të punuar në ‘Portokalli’ sepse nuk më ndahet shpirti nga ky spektakël. E kam nisur këtu dhe e ndjej se duhet të jap kontributin në mënyrë që të ketë shkëlqimin e gjithanshëm. Unë dua të ndjej dhe njëherë dashurinë e madhe të publikut në këtë spektakël, i cili është më i shikuari nga komuniteti shqiptar në Amerikë, ku unë jetoj dhe ushtroj profesionin tim si artist”.- është shprehur Erand Sojli për “Top Channel”.
Pas 10 vitesh në emisionin “Portokalli”, Erand Sojli vendosi të provonte një sfidë të re, duke u bërë pjesë e “Apartamentit 2XL” vetëm për pak kohë. Sojli njihet nga publiku për personazhet si “Naqja”, “Xhixh Merimonga” apo edhe “Mantaxheri”.
